ડિસેમ્બરમાં 2 દિવસ રાજ્યની આ બેંકોને લાગશે તાળા, હડતાળ પર ઉતરવાના છે કર્મચારીઓ

આ હડતાળ મામલે મહાગુજરાત બેંક કર્મચારી એસોસિયેશનના જનરલ સેક્રેટરી જનક રાવલે કહ્યું કે,  પ્રસ્તાવિત ત્રણ બેંકોના એકીકરણના વિરોધમાં બધી જ પબ્લિક સેકટર બેંકોના કર્મચારીઓ હડતાળ પર ઉતરશે. આ એકીકરણથી રાજ્યમાં પબ્લિક સેકટરની બેંકો ઓછી થશે. પબ્લિક સેકટર બેંકો દ્વારા જ સરકારી યોજનાઓ લાગુ થઈ શકી છે. તેથી બેંક કર્મચારીઓ 25મી ડિસેમ્બરે નાતાલની જાહેર રજા અને 26મીએ હડતાળ પર ઉતરવાના છે. આથી સળંગ બે દિવસો સુધી રાજ્યની બધી પબ્લિક સેકટરની બેંકો બંધ રહેશે. 

આ મામલે ઓલ ઈન્ડિયા બેંક એમ્પ્લોઈઝ એસોસિયેશનનું કહેવું છે કે, બેંકોનું એકીકરણ કરવાથી શું ફાયદો થશે તે હજી સુધી જાણવા મળ્યું નથી. આ બાબતથી બેંકોમાં નોકરીઓ ઘટશે. હાલમાં બેડ લોનની પણ મોટી સમસ્યા છે. તેથી બેંકોનું એકીકરણ કરવું તે બેડ લોનની સમસ્યાથી બહાર આવવાનો ઉકેલ નથી. મર્જર બાદ બેડ લોનની રિકવરી યોગ્ય નહીં થઈ શકે.