ભાજપમાં ભડકો, ડેમેજ કન્ટ્રોલ માટે પક્ષે ગૃહરાજ્ય મંત્રીને મેદાનમાં ઉતાર્યા

હર્ષ સંઘવીની બેઠકમાં બે નારાજ ધારાસભ્યો ગેરહાજર 
આજે ગૃહ રાજ્યમંત્રી હર્ષ સંઘવીએ વાઘોડિયા અને કરજણમાં બેઠક કરી હતી. જેમાં નારાજ ધારાસભ્યો મધુ શ્રીવાસ્તવ અને સતીષ નિશાળિયાની ગેરહાજરી જોવા મળી. વડોદરા બાદ હર્ષ સંઘવી નર્મદાના રાજપીપળા ગયા. જ્યાં તેમણે નાંદોદના કાર્યકરોની નારાજગી દૂર કરવાનો પ્રયાસ કર્યો. આ સાથે જ વડોદરામાં સંબોધન સમયે સંઘવીએ નારાજ નેતાઓને આડકતરી રીતે સંદેશ પણ આપ્યો.

ગૃહમંત્રી હર્ષ સંઘવીએ બળવાખોર નેતાઓ પર નિશાન સાધતા કહ્યું કે, ફોર્મ ભરતાની સાથે જ વિરોધીઓ કરજણ છોડીને જતા રહે તેવી રેલી કાઢજો. ભાજપ આપણી માં છે, ભાજપે આપણને સૌને ઓળખ આપી છે તે ભુલતા નહિ. 15 થી 8 તારીખ સુધી વિસ્તારમાં ફરીને પાર્ટી તોડનારા લોકોને શોધી શોધીને તેમનો હિસાબ કરવાનું ચૂકતા નથી. ભાજપ અને ગુજરાતની જનતા ન હોય તો મારી અને તમારી કોઇ ઓળખ નથી. 

સાથે જ ગૃહમંત્રી હર્ષ સંઘવીએ કરજણમાં આમ આદમી પાર્ટી પર નિશાન સાધતા કહ્યું કે, ઈમાનદારી અને ગરીબો ની વાતો કરનારા લોકો કરોડો રૂપિયાનાં હવાલા કૌભાંડ કરી રહ્યા છે, દિલ્હી અને પંજાબથી હવાલા મારફતે ગુજરાતમાં રૂપિયા મોકલે છે. આમ આદમી પાર્ટી હવાલાથી રૂપિયા મોકલીને ગુજરાતનો માહોલ બગાડવાની કોશિશ કરી રહી છે, આ બાબતથી ચેતજો.