లాలూజీ.. శాకాహారిగా మారిపోయారా..?

ఆర్జేడీ అధ్యక్షుడు మరియు బిహార్ మాజీ ముఖ్యమంత్రి లాలూ ప్రసాద్ యాదద్ శాకాహారిగా మారిపోయారట. తన కుటుంబ జ్యోతిష్యుడు సూచించిన మేరకు ఆయన ఈ నిర్ణయం తీసుకున్నారని వార్తలు వస్తున్నాయి. గత కొంతకాలంగా వ్యక్తిగతంగా మరియు రాజకీయపరంగా కూడా ఒడిదుడుకులు ఎదుర్కొంటున్న సందర్భంలో కొన్నాళ్లు మాంసాహారానికి దూరంగా ఉండి.. శివారాధనలో మునిగితేలాలని జ్యోతిష్యుడు చెప్పిన మీదట లాలూ ఈ నిర్ణయం తీసుకున్నారని సమాచారం.

గతంలో కూడా లాలూ ప్రసాద్ యాదవ్ తాను మాంసాహారం మానేస్తానని స్వయంగా ప్రకటించారు. తనకు సాక్షాత్తు పరమశివుడు కలలో కనిపించి మాంసాహారం మానేయాలని చెప్పారని ఆయన తెలిపారు. అయితే కొన్నాళ్ళకే మళ్లీ ఆ దీక్షను విరమించుకున్నారు. ప్రస్తుతం తనకు బాగా సన్నిహితుడైన ఓ జ్యోతిష్యుడు చెప్పిన మీదట మళ్ళీ శాకాహారిగా మారిపోవాలని భావిస్తున్నారట లాలూ.

మీకో చిత్రమైన విషయం తెలుసా.. లాలూకీ చేపల కూర అంటే ఎంతో ఇష్టమట. తానే స్వయంగా చేపల కూర వండుకొని తినడమంటే మరీ ఇష్టమట. మరి ఈ కూర వాసన తన దీక్షను ఎన్నాళ్లు భగ్నం చేయకుండా ఉంటుందో తెలుసుకోవాలంటే వేచి చూడాల్సిందే..!