క్రీడరంగంపై 'బడ్జెట్ 2018'లో వరాల జల్లులు

కేంద్ర ప్రభుత్వం ప్రకటించిన 'బడ్జెట్ 2018'లో ఆర్థికమంత్రి అరుణ్ జైట్లీ క్రీడారంగంపై వరాల జల్లులు కురిపించారు. దాదాపు రూ.350 కోట్లను గత బడ్జెట్‌తో పోల్చుకుంటే ఎక్కువగా ఈ బడ్జెట్‌లో కేటాయించడం గమనార్హం. గత సంవత్సరం రూ.1592 కోట్లను క్రీడాశాఖకు కేటాయించగా.. ఈ సంవత్సరం రూ.1943 కోట్లను అదే శాఖకు కేటాయించారు. 2018లో కామన్వెల్త్ గేమ్స్‌తో పాటు ఆసియన్ గేమ్స్ ఉండడమే అందుకు కారణమని పలువురు అంటున్నారు. 

*ఈ బడ్జెట్ మొత్తంలో రూ.481 కోట్లను నేషనల్ క్యాంపులు నిర్వహించడానికి కేటాయిస్తారు.

*అలాగే వికలాంగుల్లో క్రీడలపై ఆసక్తిని పెంచేందుకు చేసే ప్రచారాల ఖర్చులకు గత సంవత్సరం రూ.4 కోట్లు కేటాయించగా.. ఈ సంవత్సరం కేవలం 1 లక్ష రూపాయలే కేటాయించడం గమనార్హం.

*"ఖేలో ఇండియా" పథకంలో భాగంగానే వికలాంగులకు కూడా చేయూతనిస్తామని.. అందుకే వారికి వేరేగా కేటాయింపులు చేయకుండా.. నామమాత్రంగా లక్ష రూపాయలు కేటాయించామని ఆర్థికమంత్రి చెప్పారు.

*అలాగే నేషనల్ స్పో్ర్ట్స్ ఫెడరేషన్‌‌ని ప్రోత్సహించేందుకు.. అలాగే సంస్థను అభివృద్ధి చేసేందుకు రూ.350 కోట్ల రూపాయలను కేటాయించారు. 

*నార్త్ ఈస్ట్ ప్రాంతంలో క్రీడల అభివృద్ధికి గాను రూ.148.4 కోట్లు కేటాయించారు. అలాగే జమ్మూ కాశ్మీర్ ప్రాంతంలో క్రీడల అభివృద్ధికి గాను కేవలం రూ.75 కోట్లే కేటాయించారు. గత సంవత్సరం కూడా అంతే మొత్తం కేటాయించారు. 

*జాతీయ సేవా పథకం నిర్వహణకు రూ.144 కోట్లు కేటాయించారు. జాతీయ క్రీడా అభివృద్ధి నిధికి కేవలం రూ.2 కోట్లే కేటాయించారు. గత సంవత్సరం మాత్రం రూ.5 కోట్లు కేటాయించారు. 

*జాతీయ స్థాయిలో కేంద్ర ప్రభుత్వం ఆధ్వర్యంలో నడిచే క్రీడాభివృద్ధి పథకం "ఖేలో ఇండియా"కి ఈ సారి ప్రభుత్వం రూ.350 కోట్ల రూపాయలను కేటాయించింది. గత సంవత్సరం మాత్రం కేవలం 140 కోట్లే కేటాయించడం గమనార్హం.