హీరో ఉదయ్ కిరణ్ బయోపిక్ పై తేజ కామెంట్

నువ్వునేను, చిత్రం, శ్రీరామ్, మనసంతా నువ్వే లాంటి హిట్ సినిమాలలో నటించి ఒకప్పుడు యూత్ ఫాలోయింగ్ బాగా పెంచుకున్న నటుడు ఉదయ్ కిరణ్. అయితే పలు కారణాల వల్ల ఈ యువనటుడికి అవకాశాలు సన్నగిల్లడం.. ఆ తర్వాత వివాహమయ్యాక తాను ఆత్మహత్య చేసుకోవడం లాంటి అంశాలు సినీ పరిశ్రమలో ఎందరినో దిగ్భ్రాంతికి గురిచేశాయి.

ఇప్పుడు తాజాగా దర్శకుడు తేజ, ఉదయ్ కిరణ్ బయోపిక్ తెరకెక్కిస్తారని వార్తలు కూడా వస్తున్నాయి. అయితే ఈ వార్తలలో ఎలాంటి నిజమూ లేదని చెప్పేశారు దర్శకుడు తేజ. ఇలాంటి వదంతులను నమ్మవద్దని ఆయన ప్రేక్షకులకు తెలిపారు. అయితే తేజ తాను ఓ పూర్తిస్థాయి కమర్షియల్ సినిమాను ఒకటి ప్లాన్ చేసినట్లు మాత్రం తెలిపారు. ఆ చిత్రంలో హీరో రానా నటిస్తున్నారని ఇండస్ట్రీ సమాచారం. ఇప్పటికే తేజ దర్శకత్వంలో రానా "నేనే రాజు నేనే మంత్రి" లాంటి బ్లాక్ బస్టర్ చిత్రంలో నటించిన సంగతి తెలిసిందే.

ఇటీవలే దర్శకుడు తేజ "ఎన్టీఆర్" బయోపిక్ చిత్రానికి దర్శకత్వ బాధ్యతలు చేపట్టినప్పటికీ ఆ తర్వాత ఆ ఆలోచనకు స్వస్తి పలికారు. అలాగే హీరో వెంకటేష్‌తో కూడా తేజ ఓ చిత్రాన్ని ప్లాన్ చేస్తున్నారు. ఆ చిత్రంలో ఆయనకు జోడిగా శ్రియ నటించనున్నట్లు సమాచారం. ఈ చిత్రంలో వెంకటేష్ ప్రొఫెసర్ పాత్రలో నటిస్తున్నారట.