)
ఐఎండీబీ (ఇంటర్నేషనల్ మూవీ డేటాబేస్) వెబ్‌సైట్ ప్రకటించిన టాప్ టెన్ ఇండియన్ స్టార్స్ జాబితాలో టాలీవుడ్ కథానాయకుడు ప్రభాస్ కూడా స్థానం దక్కించుకోవడం విశేషం. సోషల్ మీడియాలో అత్యధిక పేజ్ వ్యూస్ కలిగిన భారతీయ సినీతారల జాబితా తయారుచేసిన ప్రముఖ ఆన్-లైన్ డేటాబేస్ సంస్థ ఐఎండీబీ ఇటీవలే ఈ విషయాన్ని ప్రకటించింది. ఈ జాబితాలో కింగ్ ఖాన్ షారుఖ్ తొలి స్థానంలో నిలవగా, మిస్టర్ పర్ఫెక్షనిస్ట్ అమీర్ ఖాన్ రెండవ స్థానంలో నిలిచారు.
అయితే దక్షిణాది నుండి కేవలం ఒకే హీరోకి ఈ జాబితాలో చోటు దక్కింది. ఈ జాబితాలో ఆరో స్థానాన్ని కైవసం చేసుకున్న ప్రభాస్ ఆ ఘనతను పొందడం విశేషం. అయితే బాహుబలిలో ప్రభాస్‌తో పాటు నటించిన తమన్నా ఈ లిస్ట్‌లో 4వ స్థానాన్ని పొంది, ప్రభాస్ కన్నా మెరుగైన ర్యాంకింగ్ పొందడం గమనార్హం. సల్మాన్ ఖాన్, కత్రినా కైఫ్, ఇర్ఫాన్ ఖాన్ మొదలైన వారికి కూడా ఈ లిస్ట్‌లో చోటు దక్కింది. ఈ క్రమంలో టాప్ టెన్ కథానాయకుల పూర్తి వివరాలు మీకోసం
షారుఖ్ ఖాన్ - ప్రస్తుతం సోషల్ మీడియాలో బాగా పాపులారిటీ ఉన్న హీరోల్లో షారుఖ్ ఖాన్ మొదటి స్థానంలో కొనసాగుతున్నారు. 2017లో ఆయన నటించిన చిత్రాలు పెద్దగా విడుదలవ్వక పోయినా... ఇంకా కింగ్ ఖాన్‌కు పాపులారిటీ తగ్గలేదన్న మాట.
అమీర్ ఖాన్ - దంగల్, సీక్రెట్ సూపర్ స్టార్ లాంటి చిత్రాలతో భారతదేశానికి బాలికల సత్తా ఏమిటో చూపించిన అమీర్ రెండవ స్థానంలో నిలవడం విశేషం.
సల్మాన్ ఖాన్ - ప్రస్తుతం సల్మాన్ నటిస్తోన్న "టైగర్ జిందా హై" చిత్రంపై ప్రేక్షకులకు అంచనాలు భారీగా ఉండడం వల్ల ఆయన కూడా సోషల్ మీడియాలో బాగా ట్రెండ్ అవుతూ మూడవ స్థానంలో నిలిచారు.
తమన్నా భాటియా - మిల్కీ బ్యూటీ తమన్నాకి బాహుబలి చిత్రం విడుదలయ్యాక వచ్చిన పాపులారిటీ అంతా ఇంతా కాదు. అదే పాపులారిటీతో సోషల్ మీడియాలో ఎందరో అభిమానులను సంపాదించుకున్న తమన్నా, ఈ జాబితాలో నాల్గవ స్థానంలో కొనసాగుతున్నారు.
ఇర్ఫాన్ ఖాన్ - సహజనటుడిగా మంచి హాస్యాన్ని పండించడంలో ఇర్ఫాన్ ఖాన్ మేటి. ఇటీవలి కాలంలో ఆయన నటించిన "కరీబ్ కరీబ్ సింగిల్"లో ఆయన డైలాగ్ డెలవరీ ప్రేక్షకులకు నవ్వులు పూయించింది. ప్రస్తుతం అదే పాపులారిటీతో ఇర్ఫాన్ ఈ జాబితాలో ఐదవ స్థానంలో కొనసాగుతున్నారు
ప్రభాస్ - బాహుబలి చిత్రం విడుదలయ్యాక, దక్షిణాది నటుడు ప్రభాస్‌కి ఉత్తరాదిలో కూడా దక్కిన ఫ్యాన్ ఫాలోయింగ్ అంతా ఇంతా కాదు. ఆ ఫాలోయింగే ఆయనకు ఈ జాబితాలో ఆరవ స్థానాన్ని కట్టబెట్టింది.
అనుష్క శర్మ - ప్రస్తుతం విరాట్ కోహ్లీతో ప్రేమ వ్యవహారం, అనుష్క శర్మ పేరును సోషల్ మీడియాలో పదే పదే ప్రస్తావనకు తెస్తుందనడంలో సందేహం లేదు. అదే పాపులారిటీతో ఆమె ఈ లిస్టులో ఏడవ స్థానంలో కొనసాగుతున్నారు.
అనుష్క శెట్టి - బాహుబలిలో దేవసేన పాత్ర అనుష్కకు మంచి ఫాలోయింగే తీసుకువచ్చింది. అలాగే ప్రస్తుతం ఈమె నటిస్తోన్న భాగమతి చిత్రంపై కూడా ఆమె అభిమానులకు మంచి అంచనాలు ఉండడంతో ఈ హీరోయిన్ ఈ జాబితాలో ఎనిమిదవ స్థానాన్ని దక్కించుకున్నారని చెప్పుకోవచ్చు.
హృతిక్ రోషన్ - జయాపజయాలను పక్కన పెడితే, హృతిక్ రోషన్‌కు యువతలో ఉన్న ఫ్యాన్ ఫాలోయింగ్ అంతా ఇంతా కాదు. ఆయన డ్యాన్స్ వీడియోలు చూడడం కోసమే దాదాపు అనేకమంది అభిమానులు నెట్‌లో గడుపుతుంటారంటే అతిశయోక్తి కాదు. అదే పాపులారిటీతో హృతిక్ ఈ జాబితాలో తొమ్మిదవ స్థానంలో కొనసాగుతున్నారు.
కత్రినా కైఫ్ - దాదాపు 210 కోట్ల రూపాయలతో తెరకెక్కిస్తున్న "థగ్స్ ఆఫ్ హిందుస్తాన్" చిత్రంలో కత్రినా కైఫ్ క్వీన్ ఎలిజబెత్ పాత్రలో నటిస్తున్నారట. అలాగే టైగర్ జిందా హై చిత్రంలో సల్మాన్ సరసన కూడా నటిస్తున్నారు ఈ బాలీవుడ్ బ్యూటీ. అదే పాపులారిటీతో ఈమె ప్రస్తుతం ఈ జాబితాలో పదవ స్థానంలో కొనసాగుతున్నారట.
Newsletter
