झारखंडच्या ईशान किशनचं रेकॉर्ड, टी-२०मध्ये लागोपाठ २ शतकं

मुंबई : आयपीएल सुरु होण्याआधी मुंबईच्या टीमसाठी चांगली बातमी आहे. सय्यद मुश्ताक अली टी-२० ट्रॉफीमध्ये विकेट कीपर आणि बॅट्समन ईशान किशननं लागोपाठ दुसरं शतक ठोकलं आहे. ईशान किशन हा आयपीएलमध्ये मुंबईकडून खेळतो. उन्मुक्त चंद याच्यानंतर टी-२० क्रिकेटमध्ये लागोपाठ २ शतकं करणारा ईशान किशन हा दुसरा भारतीय खेळाडू आहे. ईशान किशनचा हा फॉर्म बघता आयपीएलमध्ये मुंबईच्या टीमच्या अपेक्षा नक्कीच वाढल्या असतील.

२० वर्षांच्या ईशान किशननं सय्यद मुश्ताक अली टी-२० ट्रॉफीमध्ये झारखंडकडून खेळताना मणीपूरविरुद्ध ६२ बॉलमध्ये ११३ रनची खेळी केली. यामध्ये १२ फोर आणि ५ सिक्सचा समावेश होता. ईशान किशनच्या या खेळीमुळे झारखंडनं २० ओव्हरमध्ये २१९/१ एवढ्या स्कोअरचा पल्ला गाठला. यानंतर झारखंडच्या बॉलरनी मणीपूरला २० ओव्हरमध्ये ९८/९ एवढाच स्कोअर करुन दिला. यामुळे झारखंडचा या मॅचमध्ये १२२ रननी विजय झाला.

याआधीच्या मॅचमध्ये ईशान किशननं जम्मू काश्मीरविरुद्ध ५५ बॉलमध्ये १०० रनची खेळी केली होती. यामध्ये ईशान किशननं ८ फोर आणि ७ सिक्स मारले. टी-२० क्रिकेटमध्ये शतक करणारा ईशान किशन हा पहिला भारतीय विकेट कीपर ठरला होता. जम्मू काश्मीरविरुद्धच्या या मॅचमध्ये झारखंडचा ९ विकेटनी विजय झाला होता.

लागोपाठ २ टी-२० मॅचमध्ये शतक करून ईशान किशन ऑस्ट्रेलियाचा डेव्हिड वॉर्नर, इंग्लंडचा केव्हिन पीटरसन, लुक राईट, दक्षिण आफ्रिकेचा रीझा हेन्ड्रीक्स या खेळाडूंच्या यादीत पोहोचला आहे.

सय्यद मुश्ताक अली टी-२० स्पर्धेच्या पॉईंट टेबलमध्ये झारखंड सध्या पहिल्या क्रमांकावर आहे. पहिल्या तिन्ही मॅचमध्ये झारखंडचा पराभव झालेला नाही. यानंतर आता २७ फेब्रुवारीला विजयवाडा इथे झारखंडचा मुकाबला नागालँडशी होईल.

सय्यद मुश्ताक अली टी-२० स्पर्धा संपल्यानंतर ईशान किशन आयपीएलमध्ये मुंबईकडून खेळताना दिसेल.