आयपीएल २०१९ : ठरलं! रोहित शर्मा ओपनिंगला खेळणार

मुंबई : आयपीएलच्या १२व्या मोसमाला २३ एप्रिलपासून सुरुवात होणार आहे. या मोसमामध्ये मुंबईचा कर्णधार रोहित शर्मा ओपनिंगला खेळणार आहे. मुंबई इंडियन्सच्या पत्रकार परिषदेमध्ये रोहित शर्माने याची घोषणा केली आहे. मागच्या काही वर्षांपासून मुंबईकडून खेळताना रोहित शर्मा हा चौथ्या क्रमांकावर बॅटिंग करायचा. या निर्णयावर अनेक दिग्गज खेळाडू आणि क्रिकेट समिक्षक आणि चाहत्यांनी नाराजी व्यक्त केली होती. तसंच रोहितने ओपनिंगलाच खेळावं, अशी मागणी होत होती. अखेर रोहित शर्माने यंदाच्या मोसमात ओपनिंगला खेळण्याचा निर्णय घेतला.

RT if you've wanted this #CricketMeriJaan #OneFamily pic.twitter.com/L41FKtdxuN

— Mumbai Indians (@mipaltan) March 19, 2019

लोकसभा निवडणुकींमुळे यंदाच्या वेळी संपूर्ण आयपीएलच्या वेळापत्रकाची घोषणा करण्यात आली नाही. आता निवडणुकांच्या तारखा जाहीर झाल्यामुळे लवकरच आयपीएलच्या उरलेल्या वेळापत्रकाची घोषणा होईल. पहिल्या २ आठवड्यांमध्ये २३ मार्च ते ५ एप्रिलदरम्यान १७ सामने खेळवण्यात येतील. यंदाच्या आयपीएलची पहिली मॅच चेन्नई आणि बंगळुरूच्या टीममध्ये रंगेल.

मुंबईच्या मॅचचं वेळापत्रक

२४ मार्च- मुंबई विरुद्ध दिल्ली- वानखेडे स्टेडियम

२८ मार्च- बंगळुरू विरुद्ध मुंबई- चिन्नास्वामी स्टेडियम

३० मार्च- पंजाब विरुद्ध मुंबई- मोहाली स्टेडियम

३ एप्रिल- मुंबई विरुद्ध चेन्नई- वानखेडे स्टेडियम

अशी आहे मुंबईची टीम

रोहित शर्मा, हार्दिक पांड्या, जसप्रीत बुमराह, कृणाल पांड्या, इशान किशन, सूर्यकुमार यादव, मयांक मार्कंडे, राहुल चहर, अनुकूल रॉय, सिद्धेश लाड, आदित्य तरे, क्विंटन डी कॉक, कायरन पोलार्ड, बेन कटिंग, मिचेल मॅकलेनघन, ऍडम मिलन, जेसन बेहरेनड्रॉफ, युवराज सिंह, लसिथ मलिंगा, अनमोलप्रीत सिंह, बरिंदर सरन, पंकज जासवाल, राशिख सलाम

मुंबई इंडियन्सची टीम आत्तापर्यंतच्या ११ आयपीएलपैकी ३ आयपीएल जिंकली. सर्वाधिक आयपीएल जिंकण्याचं रेकॉर्ड सध्या मुंबई आणि धोनीच्या चेन्नईच्या नावावर आहे. मुंबई इंडियन्सनं आत्तापर्यंत २०१३, २०१५ आणि २०१७ सालची आयपीएल जिंकली. मागच्या वर्षीच्या आयपीएलमध्ये मात्र मुंबईची कामगिरी निराशाजनक झाली. मागच्या मोसमामध्ये मुंबईला प्ले ऑफमध्येही पोहोचता आलं नव्हतं. मागच्या मोसमामध्ये निराशाजनक कामगिरी केलेल्या मुंबईच्या टीमला यावर्षी त्यांचा खेळ सुधारण्याचं आव्हान असेल. यंदाच्या वर्षी मुंबई त्यांचा पहिला सामना २४ मार्चला खेळणार आहे. वानखेडे स्टेडियमवर दिल्लीविरुद्ध ही मॅच होईल.