WhatsApp वर येतोय मुलांच्या किडनॅपिंगचा मेसेज? मग ही बातमी तुमच्यासाठीच
नवी मुंबईत गेल्या 48 तासांत आठ मुले बेपत्ता झाल्याने खळबळ उडाली होती. अखेर नवी मुंबई पोलिसांनी याप्रकरणाबाबत आता महत्त्वाचा खुलासा केला आहे.
Updated: Dec 07, 2023, 04:48 PM IST
Navi Mumbai Crime : नवी मुंबईत गेल्या 48 तासांत आठ अल्पवयीन मुले बेपत्ता झाल्याचे वृत्त समोर आल्याने खळबळ उडाली आहे. यातील काही मुलांचा शोध लागल्याची माहिती नवी मुंबई पोलिसांनी दिली आहे. पोलिसांनी दिलेल्या माहितीनुसार, 3 ते 4 डिसेंबर दरम्यान 12 ते 15 वर्षे वयोगटातील अल्पवयीन मुले बेपत्ता झाली होती. त्यानंतर विविध व्हॉट्सअॅप ग्रुपवर मुलांच्या अपहरणाचा एक मेसेज व्हायरल होत होता. मात्र आता नवी मुंबई पोलिसांनी याबाबत महत्त्वाची माहिती दिली आहे.
नवी मुंबईच्या विविध भागातून आठ अल्पवयीन मुले बेपत्ता झाल्याने पालकांमध्ये खळबळ उडाली होती. त्यातील एका मुलाचा शोध लागल्याची माहिती पोलिसांनी दिली. ही बातमी नवी मुंबईत वाऱ्यासारखी पसरली होती. अल्पवयीन मुलांचे अपहरण झाल्याचा एक व्हॉट्सअॅप मेसेज विविध शाळा आणि रहिवासी सोसायट्यांना ग्रुपवर फॉरवर्ड करण्यात आल्याने नवी मुंबईतील रहिवाशांमध्ये घबराट पसरली आहे. मात्र, अपहरणाची कोणतीही खरी घटना नसून मुलं स्वत:हून घरातून निघून गेल्याचं पोलिसांनी म्हटलं आहे.
विविध ग्रुपमध्ये फॉरवर्ड होत असलेल्या मेसेजमध्ये नवी मुंबईत 48 तासांत आठ मुले बेपत्ता झाल्याचा दावा करण्यात येत आहे. नवी मुंबई पोलिसांनी या मेसेजबाबत महत्त्वाचा खुलासा केला आहे. नवी मुंबईतआठ मुलांच्या अपहरण गुन्ह्यांची नोंद केली असली तरी, हे सर्वोच्च न्यायालयाच्या मार्गदर्शक तत्त्वांनुसार करण्यात आले असून, कोणत्याही मुलाचे अपहरण झालेले नाही, असे पोलिसांनी स्पष्ट केले आहे.
स्वतःहून घरातून निघून गेली मुले
गेल्या दोन दिवसांत बेपत्ता झालेल्या आठ मुलांपैकी पाच मुली आणि तीन मुले, 12 ते 15 वयोगटातील असल्याचे पोलिसांनी सांगितले. नवी मुंबई पोलिसांनी त्यांच्या मोबाइल लोकेशनच्या मदतीने आणि त्यांनी शेवटी भेट घेतलेल्या लोकांशी बोलून त्यांचा शोध लावला आहे. त्यातील रबाळे येथील केवळ 3 वर्षांचा मुलगा अद्याप घरी पोहोचलेला नाही. त्याचा अकोला येथे शोध लागला असून तो नातेवाईकाच्या घरी सुरक्षित आहे. तर पनवेल येथील 16 वर्षीय तरुणी उत्तर प्रदेशातील प्रियकरासोबत पळून गेल्याचे उघडकीस आले आहे. तर 13 वर्षीय मुलगी तिच्या आईने आरडाओरडा केल्याने घरातून निघून गेली होती. काही तासांतच तिच्या मोबाईल लोकेशनच्या मदतीने पोलिसांनी तिला ऐरोली येथून ताब्यात घेतलं. तर कामोठे येथील एका 14 वर्षांच्या मुलीला अनेकदा तिचे घर सोडण्याची सवय होती. पोलिसांनी तिला गुजरातमधील मावशीच्या घरातून ताब्यात घेतलं. कळंबोली परिसरातून बेपत्ता झालेल्या 12 आणि 14 वर्षांच्या दोन मुली पालकांना न सांगता विरारच्या जीवदानी मंदिरात दर्शनासाठी गेल्या होत्या. कोपर खैरणे येथून घरातून निघालेला आणखी एक 15 वर्षांचा मुलगा स्वतःहून घरी परतला आहे.
पोलिसांनी काय सांगितले?
"गेल्या दोन दिवसांत घर सोडून गेलेल्या सुमारे आठ मुले ही त्यांच्या मित्राच्या घरी किंवा नातेवाईकांच्या घरी सापडली आहेत. ज्या काळात पालकांना त्यांची मुले कुठे आहेत हे माहित नसते, तेव्हा ते आमच्याकडे येतात. सर्वोच्च न्यायालयाच्या मार्गदर्शक तत्त्वांनुसार, जेव्हा एखादा अल्पवयीन बेपत्ता होतो, जरी तो घरातून पळून जात असला तरीही, आम्ही थेट अपहरणाचा गुन्हा नोंदवतो आणि हरवलेल्या व्यक्तीची तक्रार घेतो," अशी माहिती गुन्हे शाखेचे पोलीस उपायुक्त अमित काळे यांनी दिली.
Navi Mumbai Crime : नवी मुंबईत गेल्या 48 तासांत आठ मुले बेपत्ता झाल्याने खळबळ उडाली होती. अखेर नवी मुंबई पोलिसांनी याप्रकरणाबाबत आता महत्त्वाचा खुलासा केला आहे.
By clicking “Accept All Cookies”, you agree to the storing of cookies on your device to enhance site navigation, analyze site usage, and assist in our marketing efforts.
)
Newsletter