सरकारी कार्यालयातील जीन्स पॅण्टवरची बंदी उठली, कर्मचाऱ्यांनी व्यक्त केला आनंद

अमित जोशी, मुंबई : अत्यंत सोयीच्या असलेल्या डेनिमवर राज्य सरकारनं बंदी घातल्यानं कर्मचाऱ्यांमध्ये नाराजी व्यक्त केली होती. मात्र आता सरकारी ऑफीसेसमध्ये जीन्स पॅण्टवरची बंदी उठल्यानं कर्मचाऱ्यांनी आनंद व्यक्त केला आहे.

जिन्स किंवा डेनिम हा वापरण्यासाठी आणि वावरण्यासाठी अत्यंत सोयीचा कपडा... त्यामुळे अनेक जण जिन्स वापरणं पसंत करतात. मात्र डिसेंबरमध्ये सरकारनं एक आदेश काढून सरकारी कार्यालयांमध्ये जिन्स वापरण्यावर बंदी आणली होती. 

वापरायला अत्यंत कम्फर्टेबल जिन्स...

जिन्ससोबत टी शर्ट, गडद रंगाचे, विचित्र नक्षीकाम असलेले कपडे घालून कार्यालयात येऊ नका असं आदेशात म्हटलं होतं. पुरूषांसाठी ट्राऊझर पॅण्ट, साधा शर्ट तर महिलांसाठी साडी किंवा सलवार, चुडिदार असा ड्रेसकोड ठरवून देण्यात आला होता. 

मात्र आता सरकारनं या निर्णयात थोडा बदल केला असून जिन्स वापराला परवानगी दिलीये. सरकारी कर्मचारी आणि संघटनांनी याचं स्वागत केलं आहे.

जिन्स वापराला परवानगी मिळाली असली तरी अन्य ड्रेसकोड मात्र कायम आहे. टीशर्टसह रंगीबेरंगी कपडे घालण्यावर बंदी कायम आहे.