शिवसैनिकांनीच केली उद्धव ठाकरेंच्या गाडीवर दगडफेक

पारनेर : शिवसेना पक्षप्रमुख उद्धव ठाकरे यांच्या गाडीच्या ताफ्यावर आज पारनेरमध्ये दगडफेक करण्यात आली. 

शिवसेनेच्याच एका गटाने ही दगडफेक केल्याचे समजते. त्यामुळे पारनेर तालुक्‍यातील शिवसेनेची अंतर्गत गटबाजी चव्हाट्यावर आली आहे. 

पारनेरचे आमदार विजय औटी यांच्या वाढदिवसानिमित्त आयोजित शेतकरी मेळाव्यासाठी ठाकरे पारनेर येथे आज दुपारी आले होते. पारनेर येथील सभा आटोपून ते हेलीपॅडकडे जात असताना गाड्यांच्या ताफ्यावर अचानक दगडफेक सुरू झाली. 

दगडफेक सुरू होईपर्यंत ठाकरे यांची गाडी निघून गेली होती. मात्र, आमदार विजय औटी यांच्या गाडीला काही दगड लागले. गाडीची काचही फुटली.

या दगडफेकीत शिवसेनेचे काही कार्यकर्ते जखमी झाले आहेत. शिवसेनेचे तालुकाध्यक्ष निलेश लंके यांच्या गटाने ही दगडफेक केल्याची चर्चा आहे. मात्र, लंके याघटनेस नकार दिलाय.