Loksabha Nivdnuk Nikal 2024 : सुरुवातीच्या कलांमध्ये एनडीएने पार केलं बहुमत, पाहा INDIA आघाडीला किती जागांवर आघाडी

Loksabha Nivdnuk Nikal 2024 Live: 2024 च्या लोकसभा निवडणुकीचे निकाल काही तासांत आपल्यासमोर असतील. मतमोजणी केंद्रांवर सकाळी ८ वाजल्यापासून मतमोजणीला सुरुवात झाली. पोस्टल मतपत्रिका प्रथम मोजण्यात आल्या. आता इलेक्ट्रॉनिक व्होटिंग मशिन्सची (ईव्हीएम) मतमोजणी सुरू आहे. सुरुवातीच्या ट्रेंडमध्ये सत्ताधारी एनडीएला (NDA) आघाडी मिळताना दिसत आहे. एनडीएने 300 जागांचा आकडा पार केलाय. तर इंडिया आघाडीने (INDIA) 150 चा टप्पा गाठलाय.

सत्ताधारी एनडीएने सुरुवातीच्या कलांमध्ये बहुमताचा टप्पा ओलांडला आहे. ताज्या अपडेटनुसार, एनडीए 300 जागांवर आघाडीवर आहे तर भारत आघाडी 150 जागांवर आघाडीवर आहे. दिल्लीच्या सर्व सात जागांवर भाजप आघाडीवर आहे. तर पंजाबमध्ये भाजप दोन जागांवर पुढे आहे. तर काँग्रेस तीन जागांवर पुढे आहे. काँग्रेस नेते राहुले गांधी रायबरेली आणि वायनाड या दोन्ही जागांवर पुढे आहेत. राजस्थानमधल्या कोटामधून भाजपचे ओम बिरला पुढे आहेत. नवी दिल्लीतून भाजपच्या बांसुरी स्वराज यांनी लीड घेतला आहे. तर सहारनपूरमध्ये काँग्रेसचे इमरान मसूद आघाडीवर आहेत. मैनपुरीमधून सपाच्या डिंपल यादव आघाडीवर आहेत.

VIP उमेदवारांमध्ये कोण आघाडीवर?

गोरखपूरमधून भाजपचे रवी किशन पुढे
कर्नालमधून भाजपचे माजी मुख्यमंत्री मनोहर लाल खट्टर पुढे
गुणातून भाजपचे ज्योतिरादित्य सिंधिया पुढे 
गांधीनगरमधून भाजपचे अमित शहा पुढे 
रायबरेलीमधून काँग्रेसचे राहुल गांधी पुढे
हैदराबादमधून AIMIM चे असदुद्दीन ओवेसी पुढे
पूर्णियामधून अपक्ष उमेदवार पप्पू यादव पुढे 

उत्तर प्रदेशमध्ये एनडीए 40 जागांवर आघाडीवर आहे, तर गुजरातमध्ये भाजप 25 जागांवर आघाडीवर आहे. मध्य प्रदेशात एनडीएची 29 जागांवर आघाडी आहे.