नवी दिल्ली : दिल्लीत दिवसाढवळ्या खुलेआम गोळीबार झाल्यानं एकच खळबळ उडालीय. जामियानगरमध्ये सीएएविरोधात रॅली सुरू होणार होती. त्यावेळी हा प्रकार घडला. याप्रकरणी कडक कारवाईचे आदेश गृहमंत्री अमित शाह यांनी दिलेत. जामिया भागात जे घडलं, त्याबद्दल दिल्लीच्या पोलीस आयुक्तांशी बोलणं झालंय. त्यांना कठोर कारवाईच्या सूचना दिल्यायत. असे प्रकार केंद्र सरकार सहन करणार नाही. हे गांभीर्यानं घेऊ, असं अमित शाह म्हणालेत.
आज दिल्ली में जो गोली चलाने की घटना हुयी है उसपर मैंने दिल्ली पुलिस कमिश्नर से बात की है और उन्हें कठोर से कठोर कार्यवाही करने के निर्देश दिए हैं।
— Amit Shah (@AmitShah) January 30, 2020
केंद्र सरकार इस तरह की किसी भी घटना को बर्दाश्त नहीं करेगी, इसपर गंभीरता से कार्यवाही की जाएगी और दोषी को बख्शा नहीं जायेगा।
आज दिल्ली में हुयी फायरिंग की घटना की जाँच दिल्ली पुलिस के स्पेशल सीपी, श्री प्रवीर रंजन को सौंपी है, वो समग्रता से इस पूरी घटना की जाँच करेंगे।
— Amit Shah (@AmitShah) January 30, 2020
गोळीबार करणारा हा हल्लेखोर अल्पवयीन असल्याची माहिती समोर आली आहे. आधार कार्डवर असलेल्या माहितीनुसार तो १७ वर्षांचा आहे. हल्लेखोर गौतम बुद्ध नगर (नोएडा)च्या जेवरमधल्या घोडीवाला भागात राहतो. गोपालच्या वडिलांचं पानाचं दुकान असल्याचंही सांगितलं जात आहे.
दिल्लीतला जामिया नगर परिसरातून शाहीन बागपर्यंत सीएए, एनआरसीविरोधात रॅली काढली जाणार होती. त्याचवेळी एक बंदूकधारी तरुण तिथं आला आणि त्यानं अचानक आंदोलकांच्या दिशेनं पिस्तूल रोखलं. तो वाट्टेल तसा गोळीबार करत सुटला. भर रस्त्यात गोळ्या झाडत सुटला. या परिसरात पोलीस तैनात होतेच. पोलिसांच्या देखत तो बिनदिक्कत गोळ्या झाडत होता.
या तरुणाच्या गोळीबारात शादाब नावाचा जामियाचा एक विद्यार्थी जखमी झाला. या हल्ल्यात शादाबच्या हाताला गोळी लागली. अखेर पोलिसांनी या तरुणाला पकडलं.
गोळ्या झाडण्यापूर्वी या तरुणाने फेसबुक लाईव्हही केलं होतं. फेसबूक प्रोफाईलवर या तरुणाने त्याचं टोपण नाव रामभक्त गोपाल, असं ठेवलं आहे. फेसबुक लाईव्हमध्ये त्यानं चंदनचा उल्लेख केलाय. या चंदनची २६ जानेवारी २०१८ मध्ये उत्तर प्रदेशातल्या सांप्रदायिक दंगलींमध्ये हत्या करण्यात आली होती. त्यामध्ये सलीम नावाच्या आरोपीला अटक करण्यात आलीय. आता या गोळीबाराप्रकरणी तरुणाची आणखी चौकशी सुरू आहे.
गोळीबार करण्याआधी या तरुणाने फेसबुकवर स्टेटस टाकली होती. एका स्टेटसमध्ये त्याने 'आजादी दे रहा हूं' असं लिहिलं, तर दुसऱ्या स्टेटसमध्ये त्याने 'मी इकडे एकमेव हिंदू आहे, माझ्या घराची काळजी घ्या. शाहीन बाग खेल खत्म,' असं लिहिलं. 'माझ्या अंतयात्रेत मला भगवी वस्त्र परिधान करा आणि जय श्रीरामच्या घोषणा द्या', असं स्टेटसही आरोपीने टाकलं होतं.