Kantara Movie: 'കാന്താരാ' മലയാളത്തിലേക്കും; പ‍ൃഥ്വിരാജ് പ്രൊഡക്ഷൻസ് ചിത്രം കേരളത്തിലെത്തിക്കും

കന്നഡയിൽ തരം​ഗം സൃഷ്ടിച്ച കാന്താരാ മലയാളത്തിലേക്കെത്തുന്നു. പൃഥ്വിരാജ് പ്രൊഡക്ഷൻസാണ് ചിത്രം കേരളത്തിൽ അവതരിപ്പിക്കുന്നത്. റിഷഭ് ഷെട്ടി കേന്ദ്ര കഥാപാത്രമായെത്തിയ ചിത്രം മികച്ച നിരൂപക പ്രശംസ നേടി കഴിഞ്ഞു. റിഷഭ് തന്നെയാണ് സംവിധാനവും. സെപ്റ്റംബർ 30നാണ് ചിത്രം റിലീസ് ചെയ്തത്. കിച്ച സുദീപ്, പ്രഭാസ് തുടങ്ങിയവർ ചിത്രത്തെ പ്രശംസിച്ച് രം​ഗത്തെത്തിയിരുന്നു. ഇപ്പോഴിതാ ചിത്രത്തിന്റെ മലയാളം പതിപ്പ് ഉടൻ എത്തുമെന്ന് അറിയിച്ചിരിക്കുകയാണ് പൃഥ്വിരാജ്. ചിത്രത്തെ കുറിച്ച് പൃഥ്വിരാജ് പറഞ്ഞതിങ്ങനെ...

''കന്നഡ പതിപ്പ് കണ്ടതിന് ശേഷം എനിക്ക് ഇത് കേരളത്തിലും എത്തിക്കണമെന്ന് തോന്നി. ചിത്രത്തിന്റെ മലയാളം പതിപ്പ് കേരളത്തിൽ റിലീസ് ചെയ്യുമ്പോൾ ചിത്രം ആരും കാണാതെ പോകരുത്'' എന്നാണ് പൃഥ്വിരാജ് പറയുന്നത്.

ഹോംബാലെ ഫിലിംസ് ആണ് ചിത്രത്തിന്റെ നിർമ്മാണം. ബി അജനീഷ് ലോകനാഥ് ആണ് ചിത്രത്തിന്റെ സം​ഗീത സംവിധായകൻ. സപ്തമി ഗൗഡ, കിഷോർ, അച്യുത് കുമാർ, പ്രമോദ് ഷെട്ടി, പ്രകാശ് തുമിനാട് എന്നിവരാണ് ചിത്രത്തിലെ മറ്റ് പ്രധാന താരങ്ങൾ. കർണാടകയിലെ പരമ്പരാഗത കലകളായ കാംബ്ല, ഭൂത കോല എന്നിവ ആധാരമാക്കിയുള്ള ഒരു ആക്ഷൻ ത്രില്ലറാണ് കാന്താരാ. മണിരത്നത്തിന്റെ പൊന്നിയിൻ സെൽവൻ: 1, നാഗാർജുനയുടെ ​ഗോസ്റ്റ്, ചിരഞ്ജീവിയുടെ ഗോഡ്ഫാദർ എന്നിവയുമായി ബിഗ് സ്‌ക്രീനിൽ ഏറ്റുമുട്ടിയെങ്കിലും ബോക്‌സ് ഓഫീസിൽ മികച്ച വിജയം നേടി മുന്നേറുകയാണ് കാന്താരാ.

Also Read: Ponniyin Selvan 1: വിജയ് ചിത്രത്തെയും പിന്നിലാക്കി; തമിഴ്നാട് കളക്ഷനില്‍ റെക്കോർഡിട്ട് 'പൊന്നിയിന്‍ സെല്‍വന്‍ 1'

 

ആദ്യ ദിനത്തിൽ ശരാശരി തുടക്കത്തോടെ, പ്രേക്ഷകരിൽ നിന്നും സിനിമാ നിരൂപകരിൽ നിന്നും ഒരുപോലെ പോസിറ്റീവ് പ്രതികരണങ്ങൾ ചിത്രം നേടി. 16 കോടി ബഡ്ജറ്റിൽ നിർമ്മിച്ച ആക്ഷൻ ത്രില്ലർ റിലീസ് ചെയ്ത് ഏഴ് ദിവസത്തിനുള്ളിൽ 50 കോടിയിലധികം ഗ്രോസ് നേടി. ഇന്ത്യയിൽ മാത്രമല്ല അന്താരാഷ്‌ട്ര തലത്തിലും കാന്താര ശക്തമായ മുന്നേറ്റം തുടരുകയാണ്. യുഎസിലും ഓസ്‌ട്രേലിയയിലും ചിത്രത്തിന്റെ കളക്ഷൻ രണ്ടാം വാരത്തിൽ കുതിച്ചുയർന്നു. റിഷബ് ഷെട്ടി അഭിനയിച്ച ചിത്രം അതിന്റെ ആദ്യ വാരാന്ത്യത്തിൽ ഏകദേശം 425K USD (3.50 കോടി രൂപ) കളക്ഷൻ നേടി. ഈ ആഴ്ച അവസാനത്തോടെ 700k USD (5.75 കോടി രൂപ) മറികടക്കുമെന്ന് പ്രതീക്ഷിക്കുന്നു.

ലോകമെമ്പാടുമുള്ള പ്രേക്ഷകരിൽ നിന്ന് മികച്ച പ്രതികരണം ലഭിച്ചതോടെ കന്താരയുടെ നിർമ്മാതാക്കൾ ചിത്രം ഹിന്ദിയിലേക്ക് ഡബ്ബ് ചെയ്യാൻ തീരുമാനിച്ചിരിക്കുകയാണ്. ആക്ഷൻ ത്രില്ലറിന്റെ ഹിന്ദി ട്രെയിലർ ഇന്ന് (ഒക്ടോബർ 9) പുറത്തിറങ്ങും.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...