​Gold Movie Review: 'ഗോൾഡി'ന്റെ റേറ്റ് എത്ര? ആദ്യ ഷോ കഴിയുമ്പോൾ സ്ലോ പോയ്സൺ എന്ന് പ്രേക്ഷകർ; പൃഥ്വിരാജ് - അൽഫോൻസ് പുത്രൻ തകർത്തോ?

പ്രേക്ഷകർ ഏവരും കാത്തിരുന്ന ഗോൾഡിന്റെ ആദ്യ ഷോ കഴിയുമ്പോൾ അൽഫോൻസ് പുത്രൻ ഹിറ്റ് തരും എന്ന വാക്ക് പാലിച്ചതായി ആരാധകരുടെ അഭിപ്രായം. പൃഥ്വിരാജ് - അൽഫോൻസ് പുത്രൻ ഒന്നിച്ചപ്പോൾ ലഭിച്ചത് ബ്ലോക്ബസ്റ്റർ ചിത്രം തന്നെ.  പ്രകടനങ്ങൾ കൊണ്ട് ഓരോ താരങ്ങളും തകർത്തപ്പോൾ ഷോട്ട് മേക്കിങ്ങിലും എഡിറ്റിങ്ങും കൊണ്ട് സംവിധായകൻ അൽഫോൻസ് പുത്രൻ കസറിയിട്ടുണ്ട്. ഓരോരുത്തർ അവരുടെ രീതിയിൽ പ്രകടനം കൊണ്ട് മികച്ചുനിന്നു. 

ബിജിഎമ്മും പാട്ടുകളും എടുത്ത് സൂചിപ്പിക്കേണ്ടതാണ്. കഥയിലേക്ക് പ്രേക്ഷകനെ കൊണ്ട് പോകാൻ പാട്ടുകൾ കൊണ്ട് ആറാട്ട് നൽകുകയാണ് സിനിമ.  സിനിമ അത്രമേൽ പ്രേക്ഷകനെ പാട്ടുകളിലൂടെ കൂട്ടികൊണ്ട് പോകുന്നുണ്ട്. പൃഥ്വിരാജ് പ്രൊഡക്ഷൻസിന്റെ സഹബാനറിൽ സുപ്രിയ മേനോനോടൊപ്പം ചേർന്നാണ് ലിസ്റ്റിൻ ഗോൾഡ് നിർമിച്ചിരിക്കുന്നത്. ലിസ്റ്റിൻ സ്റ്റീഫന്റെ മാജിക് ഫ്രേയിംസാണ് ഗോൾഡ് തിയറ്ററുകളിൽ എത്തിക്കുന്നത്. ദി ടീം എന്ന സിനിമ വിതരണ കമ്പനിയാണ് ചിത്രം തമിഴ്നാട്ടിൽ എത്തിക്കുന്നത്. ചിത്രത്തിന്റെ ഒടിടി അവകാശം ആമസോൺ പ്രൈം വീഡിയോ സ്വന്തമാക്കുകയും ചെയ്തു. സൺ നെറ്റ്വർക്കിനാണ് സിനിമയുടെ സാറ്റ്ലൈറ്റ് അവകാശം.

Also Read: Gold Movie Review: ഡേഞ്ചർ ജോഷിക്ക് നിധി (ഗോൾഡ്‌) കിട്ടിയാൽ? ആദ്യ പകുതി ഇങ്ങനെ

 

ജോഷി എന്ന കഥാപാത്രത്തെയാണ് പൃഥ്വിരാജ് ഗോൾഡിൽ അവതരിപ്പിച്ചത്. നയൻതാരയെത്തുന്നത് സുമംഗലി ഉണ്ണികൃഷ്ണൻ എന്ന കഥാപാത്രമായിട്ടാണ്. പൃഥ്വിരാജിനും നയൻതാരയ്ക്കും പുറമെ ഷമ്മി തിലകൻ, മല്ലിക സുകുമാരൻ, വിനയ് ഫോർട്ട്, അൽതാഫ് സലീം, സാബുമോൻ, ചെമ്പൻ വിനോദ്, ബാബുരാജ്, കൃഷ്ണ ശങ്കർ, ശബരീഷ് വർമ്മ, റോഷൻ മാത്യു, ലാലു അലക്സ്, ജാഫർ ഇടുക്കി, ജഗദീഷ്, അബു സലീം, സുരേഷ് കൃഷ്ണ, ദീപ്തി സതി, സുധീഷ്, അജ്മൽ അമീർ, പ്രേം കുമാർ, സൈജു കുറിപ്പ്,  ജസ്റ്റിൻ ജോൺ, ഫയ്സൽ മുഹമ്മദ്, എം ഷിയാസ് തുടങ്ങി വൻ താരനിരയാണ് ചിത്രത്തില്‍ അഭിനയിക്കുന്നത്.

അൽഫോൺസ് പുത്രൻ തന്നെയാണ് ചിത്രത്തിന്റെ കഥ, എഡിറ്റിങ്, സംഘട്ടനം, വിഎഫ്എക്സ്, ആനിമേഷൻ, കളർ ഗ്രേഡിങ് തുടങ്ങിയവ കൈകാര്യം ചെയ്തിരിക്കുന്നത്. ആനന്ദ് സി ചന്ദ്രനാണ് ചിത്രത്തിന്റെ ഛായാഗ്രാഹണം നിര്‍വഹിച്ചിരിക്കുന്നത്. പ്രേമം ഇറങ്ങി ഏഴ് വർഷങ്ങൾക്ക് ശേഷമെത്തിയ അൽഫോൺസ് പുത്രൻ ചിത്രമെന്ന പ്രത്യേകതയും ഗോൾഡിനുണ്ട്. അൽഫോൺസിന്റെ കരിയറിലെ മൂന്നാമത്തെ ചിത്രമാണ് ഗോൾഡ്. നിവിൻ പോളിയെ നായകനാക്കി ഒരുക്കിയ നേരം, പ്രേമം എന്നിവയായിരുന്നു അൽഫോൺസിന്റെ ആദ്യ രണ്ട് ചിത്രങ്ങൾ.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...