തിരുവനന്തപുരം: കേരളത്തിന് കേന്ദ്ര ജല കമ്മീഷന്റെ പ്രളയ മുന്നറിയിപ്പ്.
മഴ തുടരുന്ന സാഹചര്യത്തില് പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്, പാലക്കാട്, കോഴിക്കോട്,വയനാട്, കണ്ണൂര്, കാസര്ഗോഡ് എന്നീ ജില്ലകളിലെ നദികള് കര കവിഞ്ഞൊഴുകാന് സാധ്യതയുണ്ടെന്നും ഈ ജില്ലകളില് പ്രളയ സാധ്യതയുണ്ടെന്നും കേന്ദ്ര ജല കമ്മീഷന് മുന്നറിയിപ്പ് നല്കി. നദി തീരത്തുള്ളവര് അതീവ ജാഗ്രത പാലിക്കണമെന്നും അധികൃതര് നിര്ദേശിച്ചു.
തിരുവനന്തപുരം, കൊല്ലം ഒഴികെയുള്ള ജില്ലകള്ക്കാണ് മുന്നറിയിപ്പ് നല്കിയിരിക്കുന്നത്. അതേസമയം, കഴിഞ്ഞ മൂന്നു ദിവസമായി തിരുവനന്തപുരം, കൊല്ലം ഒഴികെയുള്ള ജില്ലകളില് കനത്ത മഴയാണ്. ഞായറാഴ്ച വരെ മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
സംസ്ഥാനത്ത് വ്യാഴാഴ്ച ഏറ്റവും കൂടുതല് മഴ ലഭിച്ചത് വയനാട് ജില്ലയിലാണ്. മാനന്തവാടിയില് 259 മില്ലി മീറ്ററും വൈത്തിരിയില് 244 മില്ലി മീറ്ററും മഴ പെയ്തു. കുപ്പാടിയില് 188 മി. മീറ്റര് മഴ ലഭിച്ചപ്പോള് അമ്പലവയലില് 121.1മി. മീറ്ററും മഴ പെയ്തു.