ലഖ്നൗ: ലോക്സഭാ തിരഞ്ഞെടുപ്പിന് മുന്നോടിയായി ഉത്തര് പ്രദേശില് ഉടലെടുത്ത എസ്പി-ബിഎസ്പി സഖ്യം മറ്റ് സംസ്ഥാനങ്ങളിലും തുടരാന് തീരുമാനമായി.
ലോക്സഭാ തിരഞ്ഞെടുപ്പില് മധ്യപ്രദേശിലും ഉത്തരാഖണ്ഡിലും എസ്പി-ബിഎസ്പി സഖ്യമായി തന്നെ മത്സരിക്കുമെന്ന് ഇരു പാര്ട്ടികളുടെയും നേതാക്കള് പ്രഖ്യാപിച്ചു. സഖ്യമായി മത്സരിക്കുന്നതിന് മുന്നോടിയായി സീറ്റ് വിഹിതത്തിലും തീരുമാനമായതായി മായാവതിയും അഖിലേഷ് യാദവും പുറത്തിറക്കിയ സംയുക്ത പ്രസ്താവനയില് അറിയിച്ചു.
ഉത്തരാഖണ്ഡില് ആകെയുള്ള 5 ലോക്സഭാ സീറ്റില് ഒരു സീറ്റില് എസ്പി മത്സരിക്കും. ബാക്കി 4 സീറ്റില് ബിഎസ്പി സ്ഥാനാര്ഥിയാവും മത്സരിക്കുക.
അതേസമയം, മധ്യപ്രദേശിലെ 29 സീറ്റില് 3 സീറ്റില് എസ്പി മത്സരിക്കും. ബാക്കി 26 സീറ്റില് ബിഎസ്പി സ്ഥാനാര്ഥി മത്സര രംഗത്ത് ഉണ്ടാവും.
അതേസമയം, ഉത്തര്പ്രദേശിലെ സീറ്റ് വിഹിതം സംബധിച്ച് തീരുമാനം മുന്പേ തന്നെ സഖ്യം കൈക്കൊണ്ടിരുന്നു. അന്തിമ തീരുമാനം അനുസരിച്ച് ബിഎസ്പി 38 സീറ്റിലും എസ്പി 37 സീറ്റിലുമാണ് മത്സരിക്കുന്നത്.
ഉത്തര്പ്രദേശിലെ സീറ്റ് വീതം തീരുമാനമായതിന് വെറും ആഴ്ചകള്ക്കുള്ളില്തന്നെ മധ്യപ്രദേശിലെയും ഉത്തരാഖണ്ഡിലേയും സീറ്റുകളില് ധാരണയുണ്ടാക്കാനായത് സഖ്യത്തിന്റെ നേട്ടമായി കാണാം.