)
ന്യൂഡല്‍ഹി: കോണ്ഗ്രസ് പ്രവര്‍ത്തക സമിതി ഇന്ന് മഹാരാഷ്ട്രയിലെ വാര്‍ധയില്‍ സമ്മേളിക്കും. ബി.ജെ.പിയുടെ അസഹിഷ്ണുതയും ഫാസിസവും നിറഞ്ഞ രാഷ്ട്രീയത്തിനു ബദലായി ഗാന്ധിജിയുടെ അഹിംസ സന്ദേശം ഉയര്‍ത്തിപ്പിടിക്കാന്‍ ലക്ഷ്യമിട്ടാണ് ഗാന്ധി ജയന്തി ദിനത്തില്‍ കോണ്ഗ്രസ് വാര്‍ധയില്‍ പ്രവര്‍ത്തക സമിതി ചേരുന്നത്.
കോണ്ഗ്രസ് പാര്‍ട്ടി അദ്ധ്യക്ഷന്‍ രാഹുല്‍ ഗാന്ധിയും മുന്‍ അദ്ധ്യക്ഷ സോണിയാ ഗാന്ധിയും വാര്‍ധയിലെ സേവാഗ്രാമില്‍ എത്തിച്ചേരും.
ലോക്സഭ തെരഞ്ഞെടുപ്പില്‍ കോണ്ഗ്രസ് ബി.ജെ.പിക്കും മോദി സര്‍ക്കാരിനുമെതിരെ മുന്നോട്ടു വയ്ക്കുന്ന രാഷ്ട്രീയ അജണ്ടയുടെപ്രഖ്യാപനം വാര്‍ധ പ്രവര്‍ത്തക സമിതി യോഗത്തില്‍ ഉണ്ടാവുമെന്നാണ് സൂചന.
മഹാത്മ ഗാന്ധിയുടെ 149ാം ജന്മവാര്‍ഷിക വേളയില്‍ ചേരുന്ന കോണ്ഗ്രസ് പ്രത്യേക പ്രവര്‍ത്തക സമിതിയില്‍ സേവാഗ്രാം ആശ്രമത്തില്‍ പ്രാര്‍ഥന യോഗവും സംഘടിപ്പിച്ചിട്ടുണ്ട്.
ക്വിറ്റിന്ത്യ പ്രസ്ഥാനത്തിന് തുടക്കം കുറിക്കുന്ന പ്രമേയം 1942 ജൂലൈ 14ന് സേവാഗ്രാമില്‍ ചേര്‍ന്ന ഇന്ത്യന്‍ നാഷനല്‍ കോണ്ഗ്രസ് പ്രവര്‍ത്തക സമിതിയിലാണ് ഉണ്ടായത്. അതോടെയാണ് സേവാഗ്രാം ചരിത്രത്തില്‍ ഇടം നേടുന്നത്.
അതേസമയം, രാവിലെ കോണ്ഗ്രസ് പാര്‍ട്ടി അദ്ധ്യക്ഷന്‍ രാഹുല്‍ ഗാന്ധിയും മുന്‍ അദ്ധ്യക്ഷ സോണിയാഗാന്ധിയും മഹാത്മാഗാന്ധിയുടെ സ്മാരകമായ രാജ്ഘട്ടില്‍ എത്തി പുഷ്പാഞ്ജലി അര്‍പ്പിച്ചിരുന്നു.
Newsletter
