ਚੰਡੀਗੜ: ਪੰਜਾਬ ਦੇ ਮੋਹਾਲੀ 'ਚ ਦੋ ਘੰਟੇ ਦੀ ਬਾਰਿਸ਼ ਲੋਕਾਂ ਲਈ ਮੁਸੀਬਤ ਬਣ ਗਈ। ਕਈ ਇਲਾਕਿਆਂ ਵਿੱਚ ਪਾਣੀ ਲੋਕਾਂ ਦੇ ਘਰਾਂ ਵਿਚ ਵੜ ਗਿਆ ਹੈ। ਕਈ ਸੜਕਾਂ ਨੂੰ ਆਵਾਜਾਈ ਲਈ ਬੰਦ ਕਰ ਦਿੱਤਾ ਗਿਆ ਸੀ। ਬਿਜਲੀ ਸਪਲਾਈ ਵੀ ਬੰਦ ਕਰ ਦਿੱਤੀ ਗਈ। ਅੱਗ ਬੁਝਾਊ ਵਿਭਾਗ ਅਤੇ ਨਗਰ ਨਿਗਮ ਨੇ ਅਗਵਾਈ ਕੀਤੀ। ਦੱਸਿਆ ਜਾ ਰਿਹਾ ਹੈ ਕਿ ਸਥਿਤੀ 'ਚ ਸੁਧਾਰ ਹੋਣ 'ਚ ਸਮਾਂ ਲੱਗ ਸਕਦਾ ਹੈ।
ਸਵੇਰੇ ਸਵੇਰੇ ਹੋਈ ਤੇਜ਼ ਬਾਰਿਸ਼
ਸਵੇਰੇ ਤੇਜ਼ ਬਾਰਿਸ਼ ਸ਼ੁਰੂ ਹੋਈ ਜਦੋਂ ਲੋਕ ਜਾਗ ਪਏ ਤਾਂ ਚਾਰੇ ਪਾਸੇ ਪਾਣੀ ਭਰਿਆ ਹੋਇਆ ਸੀ। ਕਰੀਬ ਦੋ ਘੰਟੇ ਤੱਕ ਪਏ ਮੀਂਹ ਕਾਰਨ ਕਈ ਇਲਾਕਿਆਂ ਵਿਚ ਪਾਣੀ ਭਰ ਜਾਣ ਦੀ ਸਮੱਸਿਆ ਨਾਲ ਲੋਕਾਂ ਨੂੰ ਜੂਝਣਾ ਪਿਆ। ਖਾਸ ਕਰਕੇ ਫੇਜ਼ 4, 5 ਅਤੇ 7 ਦੇ ਲੋਕ ਪ੍ਰੇਸ਼ਾਨ ਹੋ ਗਏ। ਇਸ ਤੋਂ ਬਾਅਦ ਇਲਾਕੇ ਵਿੱਚ ਪਾਣੀ ਦੀ ਪੰਪਿੰਗ ਸ਼ੁਰੂ ਕਰ ਦਿੱਤੀ ਗਈ। ਜਦੋਂ ਕਿ ਪੀ.ਟੀ.ਐਲ. ਚੌਕ ਤੋਂ ਫੇਜ਼-3 ਅਤੇ 5 ਨੂੰ ਜਾਣ ਵਾਲੀ ਸੜਕ ਨੂੰ ਬੰਦ ਕਰ ਦਿੱਤਾ ਗਿਆ ਸੀ ਕਿਉਂਕਿ ਪਾਣੀ ਜ਼ਿਆਦਾ ਹੋਣ ਕਾਰਨ ਵਾਹਨਾਂ ਦਾ ਲੰਘਣਾ ਸੁਰੱਖਿਅਤ ਨਹੀਂ ਸੀ।
ਹਰ ਵਾਰ ਪਾਣੀ ਵਿਚ ਡੁੱਬਦਾ ਮੋਹਾਲੀ
ਮੋਹਾਲੀ ਵਿਚ ਭਾਰੀ ਬਰਸਾਤ ਦੌਰਾਨ ਲੋਕਾਂ ਨੂੰ ਹਮੇਸ਼ਾ ਹੀ ਪਾਣੀ ਭਰਨ ਦੀ ਸਮੱਸਿਆ ਨਾਲ ਜੂਝਣਾ ਪੈਂਦਾ ਹੈ। ਲੋਕ ਪਿਛਲੇ ਪੰਜ ਸਾਲਾਂ ਤੋਂ ਇਸ ਸਮੱਸਿਆ ਦਾ ਸਾਹਮਣਾ ਕਰ ਰਹੇ ਹਨ। ਨਗਰ ਨਿਗਮ ਅਤੇ ਗਮਾਡਾ ਨੇ ਕਈ ਏਜੰਸੀਆਂ ਵੱਲੋਂ ਸਰਵੇ ਵੀ ਕਰਵਾਇਆ ਪਰ ਅਜੇ ਤੱਕ ਲੋਕਾਂ ਨੂੰ ਰਾਹਤ ਨਹੀਂ ਮਿਲੀ। ਆਈ. ਆਈ. ਟੀ. ਮੁੰਬਈ ਅਤੇ ਪੀ. ਏ. ਸੀ. ਚੰਡੀਗੜ ਨੇ ਨਗਰ ਨਿਗਮ ਨੂੰ ਕਈ ਸੁਝਾਅ ਦਿੱਤੇ ਸਨ। ਇਨ੍ਹਾਂ 'ਚੋਂ ਕੁਝ 'ਤੇ ਕੰਮ ਹੋ ਚੁੱਕਾ ਹੈ ਪਰ ਬਾਕੀ ਪ੍ਰਾਜੈਕਟ ਅਜੇ ਲਟਕ ਰਹੇ ਹਨ।