Mallikarjun Kharge: 'କ'ଣ ଆପଣଙ୍କ ପାଖେ ରାବଣ ଭଳି ୧୦୦ ମୁଣ୍ଡ ଅଛି? ଆମେ ଆପଣଙ୍କୁ ପ୍ରତ୍ୟେକ ନିର୍ବାଚନରେ ​​ଦେଖୁଛୁ'

Mallikarjun Kharge on PM Modi: ଚଳିତ ବର୍ଷ ଅନୁଷ୍ଠିତ ହେଉଥିବା ଗୁଜୁରାଟ ବିଧାନସଭା ନିର୍ବାଚନକୁ ନେଇ ସରଗରମ ରହିଛି ରାଜନୀତି। ଗୋଟିଏ ପଟେ ନିର୍ବାଚନ ପାଖେଇ ଆସୁଥିବା ଅନ୍ୟପଟେ ବଢିବାରେ ଲାଗିଛି ରାଜନେତାଙ୍କ ବୟାନ ବାଜି। ସଦ୍ୟ ଏହାକୁ ନେଇ ମୁହାମୁହିଁ ହୋଇଛନ୍ତି ଉଭୟ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ବିଜେପି-କଂଗ୍ରେସ। ଯାହାର ଆରମ୍ଭ କଂଗ୍ରେସ କରିଥିବା ବେଳେ ଏହାର ପାଲଟା ଜବାବ ଦେଇଛି ବିଜେପି।

ଗୁଜୁରାଟ ବିଧାନସଭା ନିର୍ବାଚନ ୨୦୨୨ ପାଇଁ ଦଳ ପକ୍ଷରୁ ଚାଲିଥିବା ପ୍ରଚାର ଅଭିଯାନରେ ସାମିଲ ହୋଇଥିଲେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ। ଏହି କ୍ରମରେ ଅହମ୍ମଦାବାଦ ବେହରାମପୁର ଠାରେ ଆୟୋଜିତ ହୋଇଥିବା ଏକ ଜନସଭାକୁ ସମ୍ବୋଧିତ କରିଥିଲେ ମଲ୍ଲିକାର୍ଜୁନ ଖାର୍ଗେ। ହେଲେ ଏହି ସଭାରେ ପ୍ରଧାନମନ୍ତ୍ରୀ ମୋଦିଙ୍କୁ କଟାକ୍ଷ କରି କଂଗ୍ରେସ ଅଧ୍ୟକ୍ଷ ଯାହା କହିଛନ୍ତି ତାହାକୁ ନେଇ ସୃଷ୍ଟି ହୋଇଛି ବିବାଦ। 

ଜନସଭାକୁ ସମ୍ବୋଧିତ କରିବା ବେଳେ ମଲ୍ଲିକାର୍ଜୁନ ଖାର୍ଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ୧୦୦ ମୁଣ୍ଡ ଥିବା ରାବଣ ସହ ତୁଳନା କରି ଦେଇଛନ୍ତି। ଏହା ସହିତ ଗୁଜୁରାଟ ନିର୍ବାଚନରେ ପ୍ରଧାନମନ୍ତ୍ରୀ ମୋଦିଙ୍କ ଉପରେ ଅଧିକ ନିର୍ଭରଶୀଳ ଥିବାରୁ ବିଜେପି ଉଦ୍ଦେଶ୍ୟରେ କଟାକ୍ଷ କରିବାକୁ ପଛେଇ ନାହାଁନ୍ତି କଂଗ୍ରେସ ଅଧ୍ୟକ୍ଷ।    

ଦଳ ପକ୍ଷରୁ ଆୟୋଜିତ ହୋଇଥିବା ନିର୍ବାଚନ ରାଲିକୁ ସମ୍ବୋଧିତ କରି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି, "ଆମେ ପ୍ରଧାନମନ୍ତ୍ରୀ ମୋଦିଙ୍କ ଚେହେରା ନଗର ନିଗମ ନିର୍ବାଚନ ହେଉ, ବିଧାୟକ ନିର୍ବାଚନ ହେଉ କିମ୍ବା ସାଂସଦ ନିର୍ବାଚନରେ ​ ଦେଖିବାକୁ ପାଉଛୁ…ରାବଣ ଭଳି କ'ଣ ଆପଣଙ୍କ ପାଖରେ ୧୦୦ ମୁଣ୍ଡ ଅଛି? ମୁଁ ଦେଖୁଛି ବିଭିନ୍ନ ନିର୍ବାଚନରେ ପ୍ରଧାନମନ୍ତ୍ରୀ ମୋଦିଙ୍କ ନାମରେ ଭୋଟ ମଗାଯାଉଛି। ତାହା ପୌରସଂସ୍ଥା ନିର୍ବାଚନ ହେଉ ଅଥବା ନିଗମ ନିର୍ବାଚନ କିମ୍ବା ବିଧାନସଭା ନିର୍ବାଚନ…ପ୍ରାର୍ଥୀଙ୍କ ନାମରେ ଭୋଟ୍ ମାଗନ୍ତୁ…ପ୍ରଧାନମନ୍ତ୍ରୀ ମୋଦି ଆସି କ'ଣ ପୌରସଂସ୍ଥାରେ କାମ କରିବେ? କ'ଣ ସେ ଆପଣଙ୍କୁ ଆପଣଙ୍କ ଆବଶ୍ୟକତା ସମୟରେ ସାହାଯ୍ୟ କରିବାକୁ ଯାଉଛନ୍ତି? ଆପଣଙ୍କ ଚେହେରା କେତେ ଥର ଦେଖିବୁ? ସବୁ ଜାଗାରେ ଆପଣଙ୍କ ଚେହେରା ଦେଖିବାକୁ ମିଳୁଛି...କଣ ଆପଣଙ୍କ ପାଖରେ ରାବଣ ଭଳି ୧୦୦ ମୁଣ୍ଡ ଅଛି? "

କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ଏପରି ବୟାନ ସାମ୍ନାକୁ ଆସିବା ପରେ ପ୍ରତିକ୍ରିୟା ରଖିଛି ବିଜେପି। ଏନେଇ ମତ ରଖି ବିଜେପି ମୁଖପାତ୍ର ଅମିତ ମାଲବୀୟ କହିଛନ୍ତି ରାବଣ ସହ ତୁଳନା କରି କଂଗ୍ରେସ ପ୍ରଧନମନ୍ତ୍ରୀ ମୋଦିଙ୍କୁ ଅପମାନିତ କରିଛି।  କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଗୁଜୁରାଟ ବିଧାନସଭା ନିର୍ବାଚନ ମାହୋଲକୁ ସମ୍ଭାଳି ପାରୁନାହାଁନ୍ତି। ଏହି କାରଣରୁ ସେ ତାଙ୍କ ଶବ୍ଦ ଉପରେ ନିୟନ୍ତ୍ରଣ ହରାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ରାବଣ ସହ ତୁଳନା କରିଛନ୍ତି।  କଂଗ୍ରେସ ଲଗାତାର ଭାବେ ଗୁଜୁରାଟ ଏବଂ ଏହାର ପୁଅକୁ ଅପମାନିତ କରୁଛି। 

ଅନ୍ୟତମ ବିଜେପି ମୁଖପାତ୍ର ସମ୍ବିତ ପାତ୍ରା କହିଛନ୍ତି ମୋତେ ଲାଗୁଛି ପ୍ରଧାନମନ୍ତ୍ରୀଙ୍କ ପାଇଁ ଏପରି ଭାଷା ବ୍ୟବହାର କରିବା ଅନୁଚିତ। ଏହା ନିନ୍ଦନୀୟ ଏବଂ ଏହା କଂଗ୍ରେସର ମାନସିକତାକୁ ଦର୍ଶାଉଛି। ଏହା କେବଳ ପ୍ରଧାନମନ୍ତ୍ରୀ ମୋଦିଙ୍କ ପ୍ରତି ଅପମାନ ନୁହେଁ ବରଂ ପ୍ରତ୍ୟେକ ଗୁଜୁରାଟି ଏବଂ ଗୁଜୁରାଟ ପାଇଁ ଅପମାନ। ପ୍ରଧାନମନ୍ତ୍ରୀଙ୍କୁ ରାବଣ ସହ ତୁଳନା କରିବା ଗୁଜୁରାଟ ପାଇଁ ଅପମାନଜନକ। ପ୍ରଧାନମନ୍ତ୍ରୀ ହେଉଛନ୍ତି ଗୁଜୁରାଟର ପୁଅ। ସେ ହେଉଛନ୍ତି ଗୁଜୁରାଟୀ। ଯିଏ ଗୁଜୁରାଟର ଆତ୍ମ ସମ୍ମାନର ରୂପରେ ଅଛନ୍ତି। ଦେଶର ଗରିବ ଲୋକଙ୍କୁ କିପରି ଆଗକୁ ନିଆଯାଇପାରିବ ସେଥିପାଇଁ ସେ କାର୍ଯ୍ୟ କରୁଛନ୍ତି। ଗୁଜୁରାଟର ମାଟିକୁ ନମସ୍କାର ଯିଏ ଏପରି ପୁଅ ଦେଇଛି। ତାଙ୍କୁ ରାବଣ ବୋଲି କହିବା କେବଳ ପ୍ରଧାନମନ୍ତ୍ରୀ ମୋଦୀଙ୍କ ପ୍ରତି ଅପମାନ ନୁହେଁ ବରଂ ଏହା ପ୍ରତ୍ୟେକ ଗୁଜୁରାଟୀ ଏବଂ ଗୁଜୁରାଟ ପାଇଁ ଅପମାନ।

କଂଗ୍ରେସ ଅଧ୍ୟକ୍ଷଙ୍କ ଏହି ବିବୃତ୍ତି ସମ୍ପର୍କରେ ସୋନିଆ ଗାନ୍ଧୀଙ୍କୁ ଟାର୍ଗେଟ କରି ବିଜେପି ମୁଖପାତ୍ର କହିଛନ୍ତି ଯେ ଏହା ପ୍ରମାଣିତ ହୋଇଛି ଯେ ପ୍ରଧାନମନ୍ତ୍ରୀ ମୋଦିଙ୍କ ସମ୍ପର୍କରେ ମଲ୍ଲିକାର୍ଜୁନ ଖାର୍ଗେ ଦେଇଥିବା ବିବୃତ୍ତି ହେଉଛି ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ବିବୃତ୍ତି। ସବୁଠୁ ବଡ଼ କଥା ହେଉଛି ସୋନିଆ ଗାନ୍ଧୀ ପିଏମ ମୋଦିଙ୍କୁ ମୃତ୍ୟୁର ସୌଦାଗର ବୋଲି କହିଛନ୍ତି। ସମସ୍ତେ ଏହାର ଫଳାଫଳ ଦେଖିଲେ। ଏହାପୂର୍ବରୁ କଂଗ୍ରେସ ନେତା ମଧୁସୂଦନ ମିସ୍ତ୍ରୀ କହିଥିଲେ ଯେ ସେ ତାଙ୍କ ସ୍ଥିତି ତାଙ୍କ ଦେଖାଇ ଦେବେ। କେବଳ ଏତିକି ନୁହେଁ, କଂଗ୍ରେସ ନେତା ସୁବୋଧ କାନ୍ତ ସହାୟ ପ୍ରଧାନମନ୍ତ୍ରୀ ମୋଦୀଙ୍କ ବିଷୟରେ କହିଥିଲେ ଯେ ସେ କୁକୁର ଭଳି ମରିବେ।