Bharat Jodo Yatra: କାହା ପରାମର୍ଶରେ କଂଗ୍ରେସ କରୁଛି ୩୫୦୦ କିଲୋମିଟର ପଦଯାତ୍ରା? ଜାଣନ୍ତୁ ପ୍ରଚ୍ଛଦପଟର କାହାଣୀ

Congress Bharat Jodo Yatra: ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ (Rahul Gandhi) ନେତୃତ୍ୱରେ ଦଳର 'ଭାରତ ଯୋଡୋ ଯାତ୍ରା' (Bharat Jodo Yatra) ଆରମ୍ଭ ହୋଇଛି । କୁହାଯାଉଛି ଯେ ଏହା ମାଧ୍ୟମରେ ଦଳ ପୁଣି ଥରେ ଜାତୀୟ ସ୍ତରରେ ଦୃଢ଼ ଉପସ୍ଥିତି ସୃଷ୍ଟି କରିବାକୁ ଚେଷ୍ଟା କରୁଛି । ବର୍ତ୍ତମାନ ଖବର ପ୍ରକାଶ ପାଇଛି ଯେ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କ (Prashant Kishor) କଥା ଅନୁସରଣ କରି କଂଗ୍ରେସ ଏହି ଯାତ୍ରା କରିବାକୁ ନିଷ୍ପତ୍ତି ନେଇଛି । ଯଦିଓ ଦଳ ଓ କିଶୋରଙ୍କ ତରଫରୁ ଏ ବିଷୟରେ କିଛି କୁହାଯାଇ ନାହିଁ ।

ଅଲ ଇଣ୍ଡିଆ କଂଗ୍ରେସ କମିଟିର ଯୋଗାଯୋଗ ବିଭାଗର ସାଧାରଣ ସମ୍ପାଦକ ଜୟରାମ ରମେଶଙ୍କ ଅନୁଯାୟୀ ଦଳର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ସୋନିଆ ଗାନ୍ଧୀ ରାଜସ୍ଥାନର ଉଦୟପୁରରେ ଏକ ଚିନ୍ତନ ଶିବରରେ ଭାରତ ଯୋଡା ଯାତ୍ରା ବିଷୟରେ ଉଲ୍ଲେଖ କରିଥିଲେ । ବର୍ତ୍ତମାନ ଗଣମାଧ୍ୟମର ରିପୋର୍ଟ ଅନୁଯାୟୀ, କିଶୋର କଂଗ୍ରେସକୁ ଦେଇଥିବା ପରାମର୍ଶରେ ପଦଯାତ୍ରା ଆଲୋଚନା ମଧ୍ୟ ଅନ୍ତର୍ଭୁକ୍ତ ଥିଲା ବୋଲି ବିଶ୍ୱାସ କରାଯାଉଛି ।

ଏପ୍ରିଲରେ କିଶୋର କଂଗ୍ରେସରେ ଯୋଗଦେବାକୁ ନେଇ କଳ୍ପନାଜଳ୍ପନା ଚାଲିଥିଲା । ତେବେ ଏହି ଆଲୋଚନାକୁ ରାଜନୈତିକ ରଣନୀତିଜ୍ଞ ନିଜେ ବିରାମ ଦେଇଥିଲେ । ସେହି ସମୟରେ ସୋସିଆଲ ମିଡିଆରେ ୮୫ ପୃଷ୍ଠାର ଏକ ପ୍ରେଜେଣ୍ଟେସନ ଭାଇରଲ ହୋଇଥିଲା ​​। ତେବେ ଇଣ୍ଡିଆନ୍ ଏକ୍ସପ୍ରେସ ସହ ବାର୍ତ୍ତାଳାପରେ କିଶୋର ଏହାକୁ ଏକ ପୁରୁଣା/ନକଲି ପ୍ରେଜେଣ୍ଟେସନ ବୋଲି କହିଛନ୍ତି ଓ ଜାରି ଆଲୋଚନା ସହ ଏହାର କୌଣସି ସମ୍ପର୍କ ନାହିଁ ବୋଲି ସେ କହିଥିଲେ ।

ରିପୋର୍ଟ ଅନୁଯାୟୀ, ପ୍ରେଜେଣ୍ଟେସନରେ କୁହାଯାଇଛି ଯେ ୨୦୧୪ ପରଠାରୁ ଦଳ ଜାତୀୟ ସ୍ତରରେ କୌଣସି ଆନ୍ଦୋଳନ କିମ୍ବା ବିରୋଧର ଆୟୋଜନ କରି ନାହିଁ, ଯାହା ୨୪ ଘଣ୍ଟାରୁ ଅଧିକ ସମୟ ଧରି ରହିଛି । ଶେଷ ଥର ପାଇଁ ସ୍ୱର୍ଗତ ରାଜୀବ ଗାନ୍ଧୀ ୧୯୯୦ ମସିହାରେ ଭାରତ ଗସ୍ତର ଆୟୋଜନ କରିଥିଲେ ।

କଂଗ୍ରେସ ଅନୁଭବ କରୁଛି ଯେ ରାଜନୈତିକ ଦଳଗୁଡ଼ିକ ପାଇଁ ପଦଯାତ୍ରା ସହାୟକ ହୋଇଥାଏ । ଉଦାହରଣ ସ୍ୱରୂପ ମହାତ୍ମା ଗାନ୍ଧୀଙ୍କ ଦାଣ୍ଡି ମାର୍ଚ୍ଚ, ପୂର୍ବତନ ପ୍ରଧାନମନ୍ତ୍ରୀ ଚନ୍ଦ୍ରଶେଖରଙ୍କ କନ୍ୟାକୁମାରୀରୁ ରାଜଘାଟ ପର୍ଯ୍ୟନ୍ତ ଯାତ୍ରା, ୧୯୯୦ ରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଭାରତ ଗସ୍ତ ଯାତ୍ରା, ବିଜେପି ନେତା ଏଲ.କେ ଆଡଭାନୀଙ୍କ ରଥ ଯାତ୍ରା ଓ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀଙ୍କ ୨୦୧୭ ପଦଯାତ୍ରା ମଧ୍ୟ ଦେଶରେ ପୂର୍ବରୁ ଦେଖିବାକୁ ମିଳିଛି ।

ସୂଚନା ମୁତାବକ କିଶୋରଙ୍କ ତରଫରୁ କଂଗ୍ରେସକୁ କିଛି ପରାମର୍ଶ ଦିଆଯାଇଛି । ଦଳକୁ ନେତୃତ୍ୱ ସଙ୍କଟ ଦୂର କରିବାକୁ ପଡ଼ିବ ବୋଲି କୁହାଯାଇଥିଲା । ଏଥି ସହିତ ମିଳିତ ମଞ୍ଚର ସମସ୍ୟାର ମଧ୍ୟ ସମାଧାନ ହେବା ଆବଶ୍ୟକ । ଏହା ବ୍ୟତୀତ ଦଳକୁ ନିଜର ପୁରୁଣା ଆଦର୍ଶକୁ ଫେରିବାକୁ ପଡ଼ିବ ବୋଲି କୁହାଯାଇଥିଲା । ନିର୍ବାଚନ ରଣନୀତିଜ୍ଞ ପରାମର୍ଶ ଦେଇଛନ୍ତି ଯେ ଦଳ ଏହାର ନେତା ତଥା କର୍ମୀଙ୍କୁ ତୃଣମୂଳ ସ୍ତରରେ ସଂଗଠିତ କରିବା ସହ ଯୋଗାଯୋଗ ବ୍ୟବସ୍ଥାରେ ମଧ୍ୟ ଉନ୍ନତି ଆଣିବ ।

ଏହା ବି ପଢ଼ନ୍ତୁ: Trump on PM Modi: ପିଏମ ମୋଦିଙ୍କୁ ନେଇ ବଡ ବୟାନ ଦେଲେ ଡୋନାଲ୍ଡ ଟ୍ରମ୍ପ, ଜାଣନ୍ତୁ କ'ଣ କହିଲେ