Mission Dakhin:ମିଶନ ଦକ୍ଷୀଣର ବ୍ୟସ୍ତ କାହିଁକି ପ୍ରଧାନମନ୍ତ୍ରୀ ମୋଦି,୪ ଶହ ପାର ପାଇଁ ବିଜେପିର ପ୍ଲାନ୍ ସେଟ୍

Mission Dakhin: ଗୋଟିଏ ସମୟରେ ବିଜେପିର ନାରା ଥିଲା –ଏଥର ବିଜେପି । ଏହି ନାରା ଦେବାର ୨୪ ବର୍ଷ ପରେ ୨୦୧୪ରେ ବିଜେପି ନିଜ ବଳରେ କେନ୍ଦ୍ରରେ ସରକାର ଗଠନ କରିଥିଲା । ଏହାପୂର୍ବରୁ ବିଜେପି ଅବଶ୍ୟ ସରକାର ଗଠନ କରିଥିଲା କିନ୍ତୁ ତାହା ମେଣ୍ଟ ଆଶାବାଡ଼ି ସାହାରାରେ ଚାଲୁଥିଲା । ୨୦୧୪ରେ ଏକକ ସଂଖ୍ୟାଗରିଷ୍ଠତା ବିଜେପିର ମହତ୍ୱାକାଂକ୍ଷାକୁ ବଢାଇ ଦେଇଥିଲା । ନିଜ ରେକର୍ଡକୁ ଭାଙ୍ଗିବାର ଜିଦ ତାକୁ ୨୦୧୯ରେ ୩୦୩ ଆସନ ଦେଇଥିଲା । ଏଥର ବିଜେପିର ନାରା ହେଉଛି ଅବ୍ କି ବାର ୪ଶୋ ପାର । ଆଉ ବିଜେପିର ୪ଶହ ଆସନ ପାର ଟାର୍ଗେଟରେ ଦକ୍ଷୀଣ ଭାରତୀୟ ରାଜ୍ୟ ମହତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ । କାରଣ ହିନ୍ଦି ବେଲ୍ଟରେ ବିଜେପି ଏବେ ଏମିତି ଏକ ବିନ୍ଦୁରେ ଅଛି,ଯେଉଁଠାରୁ ଆଉ ସିଟ୍ ସଂଖ୍ୟା ବଢିବା ସହଜ ନୁହେଁ । ଉତ୍ତର ଭାରତରେ ବିଜେପିର ବଡ଼ ଲକ୍ଷ୍ୟ ହେଉଛି ପୁରୁଣା ସଂଖ୍ୟାକୁ ଅକ୍ଷୁର୍ଣ୍ଣ ରଖିବା । ବିଜେପି ଯଦି କେଉଁ ଭାଗରେ ଅଧିକ ସିଟ୍ ହାସଲ କରିପାରିବ ତେବେ ତାହା ହେଉଛି ଦକ୍ଷୀଣ ଭାରତ । ଆଉ ଏହି ମିଶନ ଦକ୍ଷୀଣ ଭାରତକୁ ଏବେ ରୂପ ଦେଉଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

 କାରଣ ଦକ୍ଷିଣ ଭାରତର ୫ଟି ରାଜ୍ୟରେ ନ ଜିତି ୪୦୦ ଆସନରେ ପହଞ୍ଚିବା ଅତ୍ୟନ୍ତ କଷ୍ଟକର ହେବ। ତେଣୁ ଏଥର ପ୍ରଧାନମନ୍ତ୍ରୀ ମୋଦିଙ୍କ ବିଜୟ ରଥ  ଦକ୍ଷିଣ ଭାରତକୁ  ୪ଶହ ପାର ସ୍ଲୋଗାନ ଦେଇ ବାହାରିଛି ।ମୋଦି ଆସନ୍ତା  ୫ ଦିନ ଦକ୍ଷୀଣ ଭାରତରେ ରହିବେ । ସେ ସେଠାରେ  ୧୨୦ ଘଣ୍ଟା ଧରି ପ୍ରଚାର କରିବେ ।

୪୦୦ ଲକ୍ଷ୍ୟ ହାସଲ ପାଇଁ ପ୍ରଧାନମନ୍ତ୍ରୀ ମୋଦୀ ଦକ୍ଷିଣ ଭାରତର ୧୨୯ ଲୋକସଭା ଆସନ ଉପରେ ଫୋକସ୍ ବଢ଼ାଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଆନ୍ଧ୍ରପ୍ରଦେଶରେ ନିଜର ପ୍ରଥମ ନିର୍ବାଚନୀ ରାଲିକୁ ସମ୍ବୋଧିତ କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, "ମୋତେ ବ୍ରହ୍ମା, ବିଷ୍ଣୁ ଏବଂ ମହେଶ୍ୱରଙ୍କ ଆଶୀର୍ବାଦ ମିଳୁଛି। ତ୍ରିଦେବଙ୍କ ଏହି ଆଶୀର୍ବାଦରେ ଆମ ସରକାରର ତୃତୀୟ ପାଳିରେ  ଆହୁରି ବେଶ ବଡ଼ ନିଷ୍ପତ୍ତି ନେବ।

ଆନ୍ଧ୍ରପ୍ରଦେଶରେ ବିଜେପିର ଗଣିତ କେମିତି?

ଆନ୍ଧ୍ରପ୍ରଦେଶରେ ବିଜେପି ଟିଡିପି ଓ ଜନସେନା ପାର୍ଟି ସହ ମେଣ୍ଟ କରିଛି। ତେଣୁ ପାଲନାଡୁର ରାଲିରେ ତିନି ଦଳର ନେତା ଓ କର୍ମୀ ଉପସ୍ଥିତ ଥିଲେ। ଚନ୍ଦ୍ରବାବୁ ନାଇଡୁ ଓ ପୱନ କଲ୍ୟାଣ ଏକାଠି ହେବା ପରେ ଆନ୍ଧ୍ରପ୍ରଦେଶରେ ବିଜେପିର ୨୫ଟି ଆସନ ସହ ମଜବୁତ ସ୍ଥିତି ରହିଛି। କର୍ଣ୍ଣାଟକ ଏବଂ ତେଲେଙ୍ଗାନାରେ ବିଜେପିର ସଂଗଠନ ମଜବୁତ ରହିଛି। ଆନ୍ଧ୍ରରେ ମେଣ୍ଟ ହେବା ପରେ ଏହି ଦକ୍ଷିଣ ରାଜ୍ୟରୁ ବିଜେପିର ଆଶା ମଧ୍ୟ ବୃଦ୍ଧି ପାଇଛି।

ପ୍ରଧାନମନ୍ତ୍ରୀ ମୋଦିଙ୍କୁ କାହିଁକି ଲୋକଙ୍କ ସହିତ ସମ୍ପର୍କ ସ୍ଥାପନ କରିବାରେ ସର୍ବଶ୍ରେଷ୍ଠ  କୁହାଯାଏ ତାହା ପାଲନାଡୁର ରାଲିରେ ଦେଖିବାକୁ ମିଳିଥିଲା । ଜନସେନା ପାର୍ଟିର ପବନ କଲ୍ୟାଣ ଭାଷଣ ଦେଉଥିଲେ। ଏହି ସମୟରେ କିଛି ଲୋକ ଟାୱାର ଉପରକୁ ଚଢ଼ି ଯାଇଥିଲେ। ପ୍ରଧାନମନ୍ତ୍ରୀ ମୋଦୀ ପୱନ କଲ୍ୟାଣଙ୍କୁ ମଝିରେ ଅଟକାଇଥିଲେ ଏବଂ ତା'ପରେ ମାଇକ୍ ରେ ଆସି ଲୋକଙ୍କୁ ତଳକୁ ଓହ୍ଲାଇବାକୁ କହିଥିଲେ। ପ୍ରଧାନମନ୍ତ୍ରୀ କହିଲେ, "ପୱନ, ପୋଲିସକୁ ସେମାନଙ୍କୁ ତଳକୁ ଆଣିବାକୁ କୁହ, ସେଠାରେ ବିଦ୍ୟୁତ ତାର ଅଛି, ଆପଣ ମାନେ କ'ଣ କରୁଛନ୍ତି?" ଦୟାକରି ତଳକୁ ଆସନ୍ତୁ। ଆପଣଙ୍କ ଜୀବନ ଆମ ପାଇଁ ମୂଲ୍ୟବାନ । ଆପଣମାନେ ତଳକୁ ଆସନ୍ତୁ ।

୧୨୦ ଘଣ୍ଟାରେ ୧୨୯ ଆସନରେ ପ୍ରଚାର କରିବେ ପ୍ରଧାନମନ୍ତ୍ରୀ

ଚଳିତ ନିର୍ବାଚନରେ ତାମିଲନାଡୁରେ ୩୯, କେରଳରେ ୨୦, ତେଲେଙ୍ଗାନାରେ ୧୭, ଆନ୍ଧ୍ରପ୍ରଦେଶରେ ୨୫ ଏବଂ କର୍ଣ୍ଣାଟକରେ ୨୮ ଆସନ ଥିବାରୁ ଦକ୍ଷିଣ ଉପରେ ପ୍ରଧାନମନ୍ତ୍ରୀ ମୋଦୀଙ୍କ ପୂର୍ଣ୍ଣ ଫୋକସ୍ ରହିଛି। ଯଦି ଏହି ୫ଟି ରାଜ୍ୟର ଆସନକୁ ମିଶାଇ ଦିଆଯାଏ ତେବେ ଲୋକସଭା ଆସନ ସଂଖ୍ୟା ୧୨୯ ରହିଛି। ଏଭଳି ସ୍ଥିତିରେ ବିଜେପି ଯଦି ଏଠାରୁ ଅଧିକରୁ ଅଧିକ ଆସନ ହାତେଇବାରେ ସଫଳ ହୁଏ, ତେବେ ସହଜରେ ନିଜ ଲକ୍ଷ୍ୟ ହାସଲ କରିପାରିବ। ପିଏମ ମୋଦୀ ୧୨୦ ଘଣ୍ଟା ମଧ୍ୟରେ ୧୨୯ ଟି ଲୋକସଭା ଆସନକୁ କଭର  କରିବାକୁ ଯୋଜନା ପ୍ରସ୍ତୁତ କରିଛନ୍ତି ।

ଆନ୍ଧ୍ରପ୍ରଦେଶରେ ଶକ୍ତି ପ୍ରଦର୍ଶନ ପରେ ପ୍ରଧାନମନ୍ତ୍ରୀ ମୋଦୀ ଆସନ୍ତା ୪୮ ଘଣ୍ଟା ତେଲେଙ୍ଗାନା, ତାମିଲନାଡୁ ଓ କେରଳରେ ବିତାଇବାକୁ ଯାଉଛନ୍ତି। ଏହି ସମୟରେ ସେ ବଡ଼ ବଡ଼ ରୋଡ୍ ସୋ ଓ ରାଲି କରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ୧୮ ତାରିଖ ପୂର୍ବାହ୍ନ ସାଢ଼େ ୧୧ଟାରେ ତେଲେଙ୍ଗାନାର ଜଗତିଆଲରେ ଏକ ସାଧାରଣ ସଭାକୁ ସମ୍ବୋଧିତ କରିବେ। ଅପରାହ୍ନ ୩ଟା ୧୫ରେ ସେ କର୍ଣ୍ଣାଟକର ଶିବମୋଗାରେ ଏକ ରାଲି କରିବେ। ତେଲେଙ୍ଗାନା ଓ କର୍ଣ୍ଣାଟକ ପରେ ତାମିଲନାଡୁ ଯିବେ ପ୍ରଧାନମନ୍ତ୍ରୀ ମୋଦି । ଅପରାହ୍ନ ୫ଟା ୪୫ରେ ସେ କୋଏମ୍ବାଟୁରରେ ଏକ ବିଶାଳ ରୋଡ୍ ସୋ କରିବେ। ମାର୍ଚ୍ଚ ୧୮ ତାରିଖ ରାତିରେ ପ୍ରଧାନମନ୍ତ୍ରୀ ମୋଦୀ କୋଏମ୍ବାଟୁର ସର୍କିଟ ହାଉସରେ ରାତି ବିତାଇବେ। ମାର୍ଚ୍ଚ ୧୯ ତାରିଖ ପୂର୍ବାହ୍ନ ସାଢ଼େ ୧୦ଟାରେ ପ୍ରଧାନମନ୍ତ୍ରୀ କେରଳର ପାଲକ୍କଡରେ ଏକ ରୋଡ୍ ସୋ କରିବେ। ସେହିଦିନ ଅପରାହ୍ନ ୧ଟାରେ ସେ ପୁଣି ତାମିଲନାଡୁ ଯିବେ। ଯେଉଁଠାରେ ସେ ସାଲେମରେ ଏକ ବଡ ରାଲି କରିବେ ।

କର୍ଣ୍ଣାଟକରେ ବିଜେପି ମଜବୁତ ସ୍ଥିତିରେ ରହିଛି

କର୍ଣ୍ଣାଟକ ଏବଂ ତେଲେଙ୍ଗାନା ହେଉଛି ଦକ୍ଷିଣର ଦୁଇଟି ରାଜ୍ୟ ଯେଉଁଠାରୁ ବିଜେପି ସାଂସଦମାନେ ଲୋକସଭାରେ ପହଞ୍ଚିଛନ୍ତି। କର୍ଣ୍ଣାଟକରେ ବିଜେପି ଦୃଢ଼ ସ୍ଥିତିରେ ରହିଛି ଏବଂ ଲୋକସଭା ନିର୍ବାଚନରେ କ୍ରମାଗତ ଭାବେ ଭଲ ପ୍ରଦର୍ଶନ କରୁଛି। ୨୦୧୪ ଲୋକସଭା ନିର୍ବାଚନରେ କର୍ଣ୍ଣାଟକରେ ବିଜେପିକୁ ୧୭ଟି ଆସନ ମିଳିଥିବା ବେଳେ ଏହାର ଭୋଟ୍ ପ୍ରାୟ ୪୩ ପ୍ରତିଶତ ଥିଲା। ୨୦୧୯ ଲୋକସଭା ନିର୍ବାଚନରେ ବିଜେପି ଅଧିକ ଶକ୍ତିଶାଳୀ ହୋଇଥିଲା। ଏହାର ଆସନ ୨୫କୁ ବୃଦ୍ଧି ପାଇଥିବା ବେଳେ ଭୋଟ୍ ପ୍ରତିଶତ ୫୧.୩୮ ପ୍ରତିଶତରେ ପହଞ୍ଚିଥିବା ବେଳେ ପ୍ରଧାନମନ୍ତ୍ରୀ ମୋଦୀ କର୍ଣ୍ଣାଟକରେ ବିଜେପିର ଏହି ପ୍ରଦର୍ଶନକୁ କେବଳ ୨୮ ଟି ଆସନ ରେ ଦୋହରାଇବାକୁ ଚେଷ୍ଟା କରୁନାହାନ୍ତି, ବରଂ ଏହି ସଂଖ୍ୟାକୁ ଆହୁରି ବଢ଼ାଇବାକୁ ଚେଷ୍ଟା କରୁଛନ୍ତି।

ତାମିଲନାଡୁ, ଆନ୍ଧ୍ରପ୍ରଦେଶ, କର୍ଣ୍ଣାଟକ, କେରଳ ଓ ତେଲେଙ୍ଗାନାର ଗତ ୧୨୯ଟି ଲୋକସଭା ଆସନରୁ ବିଜେପି ୨୯ଟି ଆସନରେ ବିଜୟୀ ହୋଇଛି। ବିଜୟୀ ସାଂସଦଙ୍କ ମଧ୍ୟରେ କର୍ଣ୍ଣାଟକର ୨୫ ଜଣ ଓ ତେଲେଙ୍ଗାନାର ୪ ଜଣ ଅଛନ୍ତି। ୨୦୧୯ ଲୋକସଭା ନିର୍ବାଚନରେ ତାମିଲନାଡୁ, ଆନ୍ଧ୍ରପ୍ରଦେଶ ଓ କେରଳର ୮୪ଟି ଲୋକସଭା ଆସନ ମଧ୍ୟରୁ ବିଜେପିକୁ ଗୋଟିଏ ବି ଆସନ ମିଳିନଥିଲା। ଏହି କାରଣରୁ ପ୍ରଧାନମନ୍ତ୍ରୀ ମୋଦୀ ଏବଂ ବିଜେପି ଏହି ଦକ୍ଷିଣ ରାଜ୍ୟଗୁଡ଼ିକ ଉପରେ ଫୋକସ୍ କରୁଛନ୍ତି।