Taali Trailer Out: ନିକଟରେ ରିଲିଜ ହୋଇଛି 'ତାଲି'ର ଟ୍ରେଲର । ନିଜର ଦମଦାର ଅଭିନୟ ପାଇଁ ବେଶ ଜଣାସୁଣା ଅଭିନେତ୍ରୀ ସୁସ୍ମିତା ସେନଙ୍କ ଧମାକେଦାର କମବ୍ୟାକକୁ ନେଇ ସବୁଠି ଚର୍ଚ୍ଚା । ଏହି ସିରିଜଟି ଅଗଷ୍ଟ ୧୫ ତାରିଖରେ ରିଲିଜ୍ ହେବ । ତେବେ ଲୋକେ ଏହି ଟ୍ରେଲରକୁ ବେଶ ପସନ୍ଦ କରୁଥିବା ଦେଖିବାକୁ ମିଳିଛି । ତେବେ ଆପଣ ଜାଣି ଆଶ୍ଚର୍ଯ୍ୟ ହେବେ ସୁସ୍ମିତା ସେନ୍ ହୃଦଘାତର ମାତ୍ର କିଛି ଦିନ ପରେ ଏହି ସିରିଜର ଡବିଂ ପାଇଁ ଷ୍ଟୁଡ଼ିଓରେ ପହଞ୍ଚିଥିଲେ ।
OTT ଫ୍ଲାଟଫର୍ମରେ ବଢିଛି ସୁସ୍ମିତା ସେନଙ୍କ କ୍ରେଜ୍ । ‘ଆର୍ଯ୍ୟ’ର ସଫଳତା ପରେ ଅଭିନେତ୍ରୀ ‘ତାଲି’ ସିରିଜରେ ଖୁବଶୀଘ୍ର ନଜର ଆସିବେ । 'ଆର୍ଯ୍ୟ'ରେ ତାଙ୍କର ଜବରଦସ୍ତ ଅଭିନୟକୁ ବେଶ ପସନ୍ଦ କରିଥିଲେ ଦର୍ଶକ । ତେବେ ବର୍ତ୍ତମାନ ଅଭିନେତ୍ରୀ ‘ତାଲି 'ମାଧ୍ୟମରେ ପୁଣି ଥରେ ଦର୍ଶକଙ୍କ ହୃଦୟ ଜିତିବାକୁ ଆସୁଛନ୍ତି ।
ଏହି ୱେବ ସିରିଜରେ ସୁସ୍ମିତା ସେନ୍ ସମାଜସେବୀ କିନ୍ନର ଶ୍ରୀ ଗୌରୀ ସାବନ୍ତଙ୍କ ଭୂମିକାରେ ନଜର ଆସିବେ । ତାଙ୍କ ଜୀବନରେ ଗାଳିରୁ ତାଳି ପର୍ଯ୍ୟନ୍ତ ଘଟିଥିବା ସମସ୍ତ ଘଟଣାବଳୀ ଓ ଦେଶରେ ତୃତୀୟ ଲିଙ୍ଗ ପାଇଁ କରିଥିବା ଲଢେଇର କାହାଣୀ ଉପରେ ଏହା ଆଧାରିତ ।
ଏହାର ଟ୍ରେଲର ଲଞ୍ଚରେ ସିରିଜ ନିର୍ମାତା ଅର୍ଜୁନ ସିଂ ଓ କାର୍ତ୍ତିକ ଡି଼. ନିଶାନନ୍ଦାର ଅଭିନେତ୍ରୀଙ୍କୁ ନେଇ ଏକ ଆଶ୍ଚର୍ଯ୍ୟ ଜନକ ଖୁଲାସା କରିଛନ୍ତି ।
ନିକଟରେ ଅଭିନେତ୍ରୀ ହାର୍ଟଆଟାକର ଶିକାର ହୋଇଥିଲେ । ଯାହାର ସୂଚନା ନିଜେ ସୁସ୍ମିତା ସୋସିଆଲ ମିଡିଆ ମାଧ୍ୟମରେ ପ୍ରଶଂସକଙ୍କୁ ଦେଇଥିଲେ। ଏହି ଘଟଣାକୁ କେନ୍ଦ୍ର କରି ଅର୍ଜୁନ ଓ କାର୍ତ୍ତିକ କହିଥିଲେ ଯେ, ସୁସ୍ମିତା ଏତେ ପରିଶ୍ରମୀ ଯେ ହୃଦଘାତର ମାତ୍ର ୮ ଦିନ ପରେ ସେ ଏହି ସିରିଜର ଡବିଂ କାର୍ଯ୍ୟ ଆରମ୍ଭ କରିଥିଲେ। ଖାଲି ସେତିକି ନୁହେଁ, ସେହି ସମୟରେ ସେ 'ଆର୍ଯ୍ୟ ୩' ର ସୁଟିଂ ମଧ୍ୟ ଶେଷ କରିଥିଲେ।
ପ୍ରକାଶ ଥାଉ କି, ଜୟପୁରରେ 'ଆର୍ଯ୍ୟ ୩' ପାଇଁ ସୁଟିଂ କରୁଥିବାବେଳେ ସୁସ୍ମିତାଙ୍କୁ ହାର୍ଟଆଟାକ୍ ହୋଇଥିଲା। ଏହାପରେ ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା।
ରିଲିଜ ହୋଇଥିବା ‘ତାଲି’ର ଟ୍ରେଲରକୁ ଲୋକେ ବେଶ ପସନ୍ଦ କରୁଥିବା ଦେଖିବାକୁ ମିଳିଛି । ଜାତୀୟ ପୁରସ୍କାର ପ୍ରାପ୍ତ ନିର୍ଦ୍ଦେଶକ ରବି ଯାଦବ ଏହାର ନିର୍ଦ୍ଦେଶନା ଦେଇଥିବାବେଳେ କ୍ଷିତିଜ ପଟବର୍ଦ୍ଧନ ଏହାର କାହାଣୀ ଲେଖିଛନ୍ତି। ଏହା ୧୫ ଅଗଷ୍ଟରେ ଜିଓ ସିନେମାରେ ପ୍ରସାରିତ ହେବ ।
କିଛିଦିନ ପୂର୍ବରୁ ‘ତାଲି’ର ପୋଷ୍ଟର ରିଲିଜ ହୋଇଥିଲା । ଯେଉଁଥିରେ ସୁସ୍ମିତାଙ୍କ ଲୁକ୍ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । ପୁରୁଷଙ୍କ ଭଳି ଚେହେରା, ଦେହରେ ଶାଢୀ, କପାଳରେ ବଡ଼ ଲାଲ ସିନ୍ଦୁର ଟୋପା ଓ ବେକରେ ଫୁଲମାଳ ପକାଇ ନଜର ଆସିଥିଲେ ଅଭିନେତ୍ରୀ ।
Newsletter
