ନୂଆଦିଲ୍ଲୀ: ୧୯୮୪ରେ ସିଆଚେନ୍ (Siachen) ଉପରେ ଭାରତ (India) ଏବଂ ପାକିସ୍ତାନ (Pakistan) ମଧ୍ୟରେ ସଂଘର୍ଷ ସମୟରେ ୧୯ କୁମାଓନ୍ ରେଜିମେଣ୍ଟର ଲାନ୍ସ ନାୟକ ଚନ୍ଦ୍ରଶେଖର (Chandrasekhar) ହରବୋଲା ବରଫଝଡ଼ରେ ପ୍ରାଣ ହରାଇଥିଲେ। ସେହି ଝଡ଼ରେ ୧୯ ଜଣ ସେନା ଶହୀଦ ହୋଇଥିଲେ। ଯେଉଁଥିରୁ ୧୪ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା। କିନ୍ତୁ ଅବଶିଷ୍ଟ ୫ଟି ମୃତଦେହ ମିଳି ନଥିଲା। ସେହି ନିଖୋଜ ମୃତଦେହ ମଧ୍ୟରେ ରହିଥିଲା ଚନ୍ଦ୍ରଶେଖରଙ୍କ ମୃତଦେହ। ୩୮ ବର୍ଷ ପରେ, ଯେତେବେଳେ ଦେଶ ସ୍ୱାଧୀନତାର ଅମୃତମୟ ମହୋତ୍ସବ ପାଳନ କରୁଛି, ସେହି ସମୟରେ ଶହୀଦ ଚନ୍ଦ୍ରଶେଖରଙ୍କ ମରଶରୀର ହଲଦ୍ୱାନୀସ୍ଥିତ ତାଙ୍କ ଘରେ ପହଞ୍ଚିବ। ଯେତେବେଳେ ଚନ୍ଦ୍ରଶେଖର ସହିଦ ହୋଇଥିଲେ, ତାଙ୍କୁ ୨୭ ବର୍ଷ ହୋଇଥିଲା ଏବଂ ତାଙ୍କର ଦୁଇ ଝିଅ ୭ ବର୍ଷ ଏବଂ ୪ ବର୍ଷର ହୋଇଥିଲା। ଆଜି ସେମାନଙ୍କର ବୟସ ୪୫ ଏବଂ ୪୨ ବର୍ଷର।
୩୮ ବର୍ଷ ପରେ ଚନ୍ଦ୍ରଶେଖରଙ୍କ ମରଶରୀର ସିଆଚେନରୁ ମିଳିଛି। ଏହି ସୂଚନା ସେନା ଦ୍ୱାରା ସେମାନଙ୍କ ପରିବାରକୁ ଦିଆଯାଇଛି। କୁହାଯାଉଛି ଯେ ତାଙ୍କ ଶରୀରକୁ ସୋମବାର ଅର୍ଥାତ୍ ସ୍ୱାଧୀନତା ଦିବସରେ ହଲଦ୍ୱାନୀକୁ ଅଣାଯିବ। ଏହା ପରେ ସହିଦଙ୍କ ଶେଷ ରୀତିନୀତି ସାମରିକ ସମ୍ମାନ ସହିତ ପାଳନ କରାଯିବ।
ସୂଚନାଯୋଗ୍ୟ ସହିଦ ଚନ୍ଦ୍ରଶେଖରଙ୍କ ପତ୍ନୀ ଶାନ୍ତି ଦେବୀ ହଲଦ୍ୱାନୀର ଧାନ ମିଲ ନିକଟ ସରସ୍ୱତୀ ବିହାର କଲୋନୀରେ ରୁହନ୍ତି। ୩୮ ବର୍ଷ ପୂର୍ବେ ଯେତେବେଳେ ତାଙ୍କ ସ୍ୱାମୀ ସହିଦ ହୋଇଥିଲେ, ସେତେବେଳେ ସେ ମୃତଦେହ ନ ପାଇ ତାଙ୍କୁ ରୀତିନୀତି ଅନୁଯାୟୀ ଶବଦାହ କରିଥିଲେ। ଶରୀରର ପୁନରୁଦ୍ଧାର ହୋଇନଥିବାରୁ ଶାନ୍ତି ଦେବୀ ଏବଂ ତାଙ୍କ ଝିଅମାନେ ତାଙ୍କୁ ଶେଷ ଦର୍ଶନ ମଧ୍ୟ କରିପାରିନଥିଲେ। ବର୍ତ୍ତମାନ ସେନା ପକ୍ଷରୁ ଏହି ସୂଚନା ଦିଆଯିବା ପରେ ଝିଅମାନେ ନିଜ ପିତାଙ୍କ ଚେହେରା ଦେଖି ପାରିବେ।
ସୂଚନାଯୋଗ୍ୟ ଆଜି ଦେଶ ୭୬ତମ ସ୍ୱାଧୀନତା ଦିବସ ପାଳନ କରୁଛି ଦେଶ। ଲାଲକିଲ୍ଲାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପତାକା ଉତ୍ତୋଳନ କରିବା ସହିତ ଦେଶକୁ ସମ୍ବୋଧନ କରିଥିଲେ। ଦେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଅଭିନନ୍ଦନ ଜଣାଇଛନ୍ତି । ସେ କହିଛନ୍ତି ଯେ ଆଜି ବିଶ୍ୱର କୋଣ କୋଣରେ ଭାରତର ତ୍ରିରଙ୍ଗା ଗର୍ବର ସହିତ ଉଡ଼ୁଛି । ଭାରତ ବର୍ତ୍ତମାନ ଅମୃତକାଳରେ ପ୍ରବେଶ କରୁଛି, ଆସନ୍ତା ୨୫ ବର୍ଷ ଦେଶ ପାଇଁ ଗୁରୁତ୍ୱପୂର୍ଣ୍ଣ ହେବ।
ଦେଶକୁ ସମ୍ବୋଧିତ କରି ପିଏମ ମୋଦି (PM Modi) କହିଛନ୍ତି ଯେ, ଏହି ସ୍ୱାଧୀନତା ଦିବସରେ ମୁଁ ସମସ୍ତ ଭାରତୀୟ ଓ ଯେଉଁମାନେ ଭାରତକୁ ଭଲ ପାଆନ୍ତି ସେମାନଙ୍କୁ ଅଭିନନ୍ଦନ ଜଣାଉଛି । ଏକ ନୂତନ ସଂକଳ୍ପ ସହିତ ଏକ ନୂତନ ଦିଗକୁ ଯିବାର ଦିନ । ସ୍ୱାଧୀନତାର ଲଢ଼େଇରେ ଦାସତ୍ୱର ସମ୍ପୂର୍ଣ୍ଣ ସମୟ ସଂଘର୍ଷରେ ଅତିବାହିତ ହୋଇଛି । ଭାରତର ଏପରି କୌଣସି କୋଣ ନଥିଲା ଯେଉଁଠାରେ ଲୋକମାନେ ଶହ ଶହ ବର୍ଷ ଧରି ଦାସତ୍ୱ ବିରୁଦ୍ଧରେ ଲଢ଼ି ନଥିଲେ । ଆଜି ପ୍ରତ୍ୟେକ ଦେଶବାସୀଙ୍କ ପାଇଁ ପ୍ରତ୍ୟେକ ମହାପୁରୁଷଙ୍କ ତ୍ୟାଗର ବଳିଦାନକୁ ପ୍ରଣାମ କରିବାର ଅବସର ଆସିଛି । ସେମାନଙ୍କର ସ୍ୱପ୍ନକୁ ପୂରଣ କରିବା ପାଇଁ ପ୍ରତିଶ୍ରୁତି ନେବା ପାଇଁ ଏହା ଏକ ସୁଯୋଗ ।
ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ମଙ୍ଗଲ ପାଣ୍ଡେ, ତାନ୍ତିଆ ଟୋପେ, ଭଗତ ସିଂ, ସୁଖଦେବ, ରାଜଗୁରୁ, ଚନ୍ଦ୍ରଶେଖର ଆଜାଦ, ଆଶଫକୁଲ୍ଲା ଖାନ, ରାମ ପ୍ରସାଦ ବିସ୍ମିଲ ଏବଂ ବ୍ରିଟିଶ ଶାସନର ମୂଳଦୁଆ ହଲାଇଦେଇଥିବା ଆମ ଅସଂଖ୍ୟ ବିପ୍ଳବୀଙ୍କୁ ଦେଶ କୃତଜ୍ଞ । ଯେତେବେଳେ ଭାରତର ମହିଳାମାନଙ୍କ ଶକ୍ତିକୁ ମନେ ପକାଯାଇଥାଏ ସେତେବେଳେ ପ୍ରତ୍ୟେକ ଭାରତୀୟ ଗର୍ବିତ ହୋଇଥାଏ, ସେ ରାଣୀ ଲକ୍ଷ୍ମୀବାଇ ହୁଅନ୍ତୁ ବା ଝଲକାରୀ ବାଇ, ଚେନ୍ନମ୍ମା, ବେଗମ୍ ହଜରତ ମହଲ ବୋଲି ସେ କହିଥିଲେ।