Ladakh Frozen Lake Marathon: ଲଦାଖସ୍ଥିତ ବିଶ୍ୱ ପ୍ରସିଦ୍ଧ ପାଙ୍ଗୋଙ୍ଗ ସୋ ହ୍ରଦ ଠାରେ ଆୟୋଜିତ ହେବାକୁ ଯାଉଛି ୨୧ କିଲୋମିଟର ଲମ୍ବା ମାରାଥନ। ଆସନ୍ତା ୨୦ ଫେବୃଆରୀରେ ଅନୁଷ୍ଠିତ ହେବାକୁ ଯାଉଥିବା ଏହି ମାରାଥନ୍ ପ୍ରାୟ ୧୩ ହଜାର ୮୬୨ ଫୁଟ ଉଚ୍ଚରେ ଆୟୋଜିତ ହେବ। ଗୁରୁତ୍ୱପୂର୍ଣ୍ଣ କଥା ହେଉଛି ଲଦାଖ ଠାରେ ଆୟୋଜିତ ହେଉଥିବା ମାରାଥନ ହେଉଛି ଦେଶର ପ୍ରଥମ ମାରାଥନ ଯାହା ବରଫରେ ଜମା ହୋଇଯାଇଥିବା ପାଙ୍ଗୋଙ୍ଗ ସୋ ହ୍ରଦରେ ଆୟୋଜିତ ହେବ। ସବୁଠାରୁ ଖାସ କଥା ଏହା ଯେ ଏହି ମାରାଥନ ସ୍ଥଳ ଭାଗ ପରିବର୍ତ୍ତେ ଜଳଭାଗରେ ଆୟୋଜିତ ହେବ।
ଲଦାଖ ପାଙ୍ଗୋଙ୍ଗ ସୋ ହ୍ରଦ (Ladakh Pangong Tso Lake) ଠାରେ ଆୟୋଜିତ ହେବାକୁ ଯାଉଥିବ ମାରାଥନ ସମ୍ପର୍କରେ ପ୍ରତିକ୍ରିୟା ରଖିଛନ୍ତି ସ୍ଥାନୀୟ ମୁଖ୍ୟ କାର୍ଯ୍ୟନିର୍ବାହୀ କାଉନସିଲର ଲେହ ଆଡଭୋକେଟ ତାସି ଗେଲସନ। ଏନେଇ ସେ କହିଛନ୍ତି ଯେ, ଆସନ୍ତା ୨୦ ଫେବୃଆରୀରେ ଲଦାଖ (Ladakh) ସ୍ୱୟଂଶାସିତ ପାହାଡ ବିକାଶ ପରିଷଦ (Autonomous Hill Development Council) ଲେହ (Leh) ଏବଂ ଲଦାଖ ପର୍ଯ୍ୟଟନ ବିଭାଗ (Ladakh Tourism Department) ସହଯୋଗରେ ଲଦାଖ ଆଡଭେଞ୍ଚର ସ୍ପୋର୍ଟସ ଫାଉଣ୍ଡେସନ (Adventure Sports Foundation Ladakh ) ଏଏସଏଫଏଲ (ASFL) ଦେଶରେ ପ୍ରଥମ ଥର ପାଇଁ ୨୧ କିଲୋମିଟର ଲମ୍ବା ପାଙ୍ଗୋଙ୍ଗ ଫ୍ରୋଜେନ ହ୍ରଦ ମାରାଥନ (Ladakh Frozen Lake Marathon) ଆୟୋଜନ କରିବାକୁ ଯାଉଛି। ଏହି ମାରାଥନ ବିଶ୍ୱର ସବୁଠାରୁ ଉଚ୍ଚା ହ୍ରଦ ଯାହା ବରଫରେ ଜମିଯାଇଛି ସେଠାରେ ଆୟୋଜିତ ହେବ। ଏହା ଗିନିଜ୍ ୱାର୍ଲ୍ଡ ରେକର୍ଡ (Guinness World Records) ସୃଷ୍ଟି କରିବାକୁ ଏକ ପ୍ରୟାସ ହେବ।
ଡେପୁଟି କମିଶନର ଲେହ ଶ୍ରୀକାନ୍ତ ବାଲାସାହେବ ସୁସେ ଏହି ମାରାଥନ ସମ୍ପର୍କରେ ପ୍ରତିକ୍ରିୟା ରଖି କହିଛନ୍ତି, ବରଫରେ ଜମା ହୋଇଯାଇଥିବା ପାଙ୍ଗୋଙ୍ଗ ସୋ ହ୍ରଦରେ ମାରାଥନ୍ ଆୟୋଜନ କରିବାର ଉଦ୍ଦେଶ୍ୟ ହେଉଛି ନିରନ୍ତର ପର୍ଯ୍ୟଟନକୁ ପ୍ରୋତ୍ସାହିତ କରିବା ତଥା ଜଳବାୟୁ ଏବଂ ପରିବେଶ ବିଷୟରେ ସଚେତନତା ସୃଷ୍ଟି କରିବା। ଏକ ସଫଳ କାର୍ଯ୍ୟକ୍ରମ ନିଶ୍ଚିତ କରିବାକୁ ସମସ୍ତ ବ୍ୟବସ୍ଥା କରାଯାଉଛି। ଏହି ମାରାଥନ୍ ହେଉଛି ଲଦାଖ ଆଡଭେଞ୍ଚର ସ୍ପୋର୍ଟସ ଫାଉଣ୍ଡେସନ ପକ୍ଷରୁ ପ୍ରସ୍ତୁତ ହୋଇଥିବା ଏକ ଅଭିଯାନ। ଯାହା "ଦି ଲଷ୍ଟ ରନ୍" (The Last Run) ନାମରେ ନାମିତ ହୋଇଛି।
ହିମାଳୟ ପାର୍ବତ୍ୟାଞ୍ଚଳରେ ରହିଥିବା ବଡ଼ ବଡ଼ ବରଫ ଖଣ୍ଡର ଅନିଶ୍ଚିତ ଅବସ୍ଥାକୁ ଦୃଷ୍ଟିରେ ରଖି ହ୍ରଦର କିଛି ଅଂଶ ଆଗାମୀ ବର୍ଷରେ ଅନୁପଯୁକ୍ତ ହୋଇପାରେ। ଏଏସଏଫଏଲ ସଭାପତି ଚାମ ତିତ୍ସେନ କହିଛନ୍ତି ଯେ ୨୦ ଫେବୃଆରୀରେ ଅନୁଷ୍ଠିତ ହେବାକୁ ଯାଉଥିବା ପାଙ୍ଗୋଙ୍ଗ ଫ୍ରୋଜେନ୍ ହ୍ରଦ ମାରାଥନ୍ ଏକ ଜୀବନବ୍ୟାପୀ ଅନୁଭୂତି ହେବ। ଏହି ଦିନିକିଆ କାର୍ଯ୍ୟକ୍ରମରେ ଅଂଶଗ୍ରହଣକାରୀ ଚର୍ଚ୍ଚିତ ପାଙ୍ଗୋଙ୍ଗ ହ୍ରଦରେ ଜମା ହୋଇଥିବା ବରଫ ଚାଦର ଉପରେ ଦୌଡି଼ବେ। ଜଳବାୟୁ ପରିବର୍ତ୍ତନ ହେତୁ ନିକଟ ଭବିଷ୍ୟତରେ ପୋଙ୍ଗାଙ୍ଗ ହ୍ରଦ ପରିବର୍ତ୍ତନର ସାମ୍ନା କରିପାରେ। ଯଦି ଆମେ ବର୍ତ୍ତମାନ ଏହି ଦର୍ଶନକୁ ଧ୍ୟାନ ନଦେବା ତେବେ ପରବର୍ତ୍ତୀ ପିଢି ପାଇଁ ଏହା ଅସ୍ୱାଭାବିକ ହୋଇପାରେ।