ED Summons: ନୂଆଦିଲ୍ଲୀ: ଦିଲ୍ଲୀ ମଦ ଆଇନ ଦୁର୍ନିତୀ ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମସ୍ୟା କମିବାରେ ନାଁ ଧରୁନାହିଁ। ଏହି ମାମଲାରେ ପଚରାଉଚରା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ ପୁଣି ଥରେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲଙ୍କୁ ହାଜର ହେବା ପାଇଁ ସମନ ଜାରି କରିଛି। ଆସନ୍ତା ୪ ତାରିଖରେ ଆମ୍ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲଙ୍କୁ ତଦନ୍ତକାରୀ ସଂସ୍ଥାରେ ହାଜର ହେବାକୁ କୁହାଯାଇଛି। ଏକ୍ସାଇଜ୍ ପଲିସି ସ୍କାମ ସହ ଜଡିତ ମନି ଲଣ୍ଡରିଂ ମାମଲାରେ କେଜ୍ରିୱାଲଙ୍କୁ ଅଷ୍ଟମ ଥର ସମନ ଜାରି କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ଆପ ମୁଖ୍ୟଙ୍କୁ ଏହା ପୂର୍ବରୁ ୭ ଥର ସମନ ଜାରି ହୋଇଥିଲେ ମଧ୍ୟ ଇଡିରେ ହାଜର ହୋଇ ନାହାନ୍ତି।
ମାର୍ଚ୍ଚ ୪ରେ ଅରବିନ୍ଦ କେଜ୍ରିୱାଲଙ୍କୁ ହାଜର ହେବାକୁ ପ୍ରବର୍ତ୍ତନ ନିର୍ଦ୍ଦେଶାଳୟ କହିଛି। କେଜ୍ରିୱାଲ ସୋମବାର ସପ୍ତମ ସମନ ପରେ ମଧ୍ୟ ଇଡ଼ିରେ ହାଜର ହୋଇନାହାନ୍ତି। କେଜରିୱାଲ କହିଛନ୍ତି କି ଇଡ଼ିରେ ହାଜର ହେବା ପାଇଁ କୋର୍ଟ ନିର୍ଦ୍ଦେଶ ଦେବା ପରେ ଯାଇ ସେ ହାଜର ହେବେ। ଗତ କିଛି ମାସ ମଧ୍ୟରେ ବାରମ୍ବାର ସମନ ଜାରି କରାଯିବା ସତ୍ତ୍ୱେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ ଥରେ ମଧ୍ୟ ତଦନ୍ତକାରୀ ସଂସ୍ଥା ନିକଟରେ ହାଜର ହୋଇନାହାଁନ୍ତି।
ସପ୍ତମ ସମନ ଉପରେ ପ୍ରତିକ୍ରିୟା ପ୍ରକାଶ କରି ଆମ୍ ଆଦମୀ ପାର୍ଟି ଦାବି କରିଛି ଯେ କଂଗ୍ରେସ ନେତୃତ୍ୱାଧୀନ ମେଣ୍ଟରୁ ବାହାରିବା ପାଇଁ ବିଜେପି ନେତୃତ୍ୱାଧୀନ କେନ୍ଦ୍ର ସରକାର ଏହା ଉପରେ ଚାପ ପକାଇବାକୁ ଚାହୁଁଛନ୍ତି। ସେ କହିଛନ୍ତି ଯେ ଏହି ମାମଲା କୋର୍ଟରେ ଅଛି ଏବଂ ପରବର୍ତ୍ତୀ ଶୁଣାଣି ମାର୍ଚ୍ଚ ୧୬ରେ ହେବ। ପ୍ରତିଦିନ ଏହି ସମନ ପଠାଇବା ପରିବର୍ତ୍ତେ ଇଡି କୋର୍ଟର ଆଦେଶକୁ ଅପେକ୍ଷା କରିବା ଉଚିତ୍। ଆମେ ଭାରତୀୟ ଜାତୀୟ ବିକାଶ ଅନ୍ତର୍ଭୂକ୍ତ ଆଲାଇନ୍ସ (INDIA) ଛାଡିବୁ ନାହିଁ ଏବଂ କେନ୍ଦ୍ର ସରକାର ଆମ ଉପରେ ଏହିପରି ଚାପ ପକାଇବା ଉଚିତ୍ ନୁହେଁ।