Amit Shah BirthDay: ବିଜେପି ଚାଣକ୍ୟଙ୍କ ଜନ୍ମଦିନ, ଜାଣନ୍ତୁ କେମିତି ଥିଲା ରାଜନୈତିକ ଯାତ୍ରା

ନୂଆଦିଲ୍ଲୀ: ଆଜି ଦେଶର ଗୃହମନ୍ତ୍ରୀ ତଥା ଭାରତୀୟ ଜନତା ପାର୍ଟିର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କର ଜନ୍ମଦିନ(Amit Shah's BirthDay)। ଭାରତୀୟ ଜନତା ପାର୍ଟି ବର୍ତ୍ତମାନର ରାଜନୀତିରେ ସବୁଠୁ ବଡ଼ ଦଳ ଭାବରେ ଉଭା ହୋଇଛି। ବିଜେପିକୁ ଏହି ଉଚ୍ଚତାକୁ ଆଣିବାରେ ଶାହଙ୍କର ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି। ଯେଉଁଥିପାଇଁ ତାଙ୍କୁ ବିଜେପିର ଚାଣକ୍ୟ ଭାବରେ ମଧ୍ୟ ଅଭିହିତ କରାଯାଏ। ଗୃହମନ୍ତ୍ରୀ ଅମିତ ଶାହା ୨୨ ଅକ୍ଟୋବର ୧୯୬୪ରେ ମୁମ୍ବାଇରେ ଜନ୍ମଗ୍ରହଣ କରିଥିଲେ। ତାଙ୍କ ପିତାଙ୍କ ନାମ ଅନିଲ ଚନ୍ଦ୍ର ଶାହା ଏବଂ ମାତାଙ୍କ ନାମ କୁସୁମ ବେନ। ସେ ଗୁଜୁରାଟି ପରିବାରର। ଅମିତ ଶାହାଙ୍କ ଜନ୍ମ ପରେ ତାଙ୍କ ପରିବାର ମୁମ୍ବାଇ ଛାଡି ଗୁଜରାଟର ପୂର୍ବପୁରୁଷ ଘରେ ରହିଥିଲେ। ତେଣୁ ଅମିତ ଶାହା ଗୁଜୁରାଟରେ ବଡ଼ ହୋଇଥିଲେ।

ଅମିତ ଶାହାଙ୍କ ଜେଜେବାପା ଚାହୁଁଥିଲେ ଯେ ସେ ପାରମ୍ପାରିକ ଶିକ୍ଷା ଲାଭ କରନ୍ତୁ। ତେଣୁ ଅମିତ ଶାହା ପିଲାଦିନେ ଆଚାର୍ଯ୍ୟ-ଶାସ୍ତ୍ରୀଙ୍କଠାରୁ ପାରମ୍ପରିକ ଶିକ୍ଷା ନେବା ଆରମ୍ଭ କରିଥିଲେ। ଅଧ୍ୟୟନ ସମୟରେ ଅମିତ ଶାହା ଅନୁଶାସନକୁ ମଧ୍ୟ ଅନୁସରଣ କରିବା ଉଚିତ୍ ବୋଲି ତାଙ୍କ ଜେଜେବାପା କହିଥିଲେ। ତେଣୁ ଅମିତ ଶାହା ଚାରି ବର୍ଷ ବୟସରେ ସକାଳ ଚାରିଟାରୁ ଉଠି ପାରମ୍ପାରିକ ପୋଷାକରେ ଅଧ୍ୟୟନ କରୁଥିଲେ। ଅମିତ ଶାହାଙ୍କର ପିଲାଦିନରୁ ସାଂଗଠନିକ ଦକ୍ଷତାର ବିକାଶ ହୋଇଥିଲା। କାରଣ ତାଙ୍କ ପରିବାରର ମଧ୍ୟ ରାଜନୈତିକ ପୃଷ୍ଠଭୂମି ରହିଥିଲା। 

ଅମିତ ଶାହା କଲେଜରେ ପଢୁଥିବା ସମୟରେ ରାଜନୀତିରେ ପ୍ରବେଶ କରିଥିଲେ। ସେ ୧୯୮୬ରେ ବିଜେପିରେ ଯୋଗ ଦେଇଥିଲେ। ଏହାପୂର୍ବରୁ ସେ ୧୯୮୨ ମସିହାରେ ପ୍ରଥମ ଥର ପାଇଁ ନରେନ୍ଦ୍ର ମୋଦୀଙ୍କୁ ଭେଟିଥିଲେ। ସେତେବେଳେ ମୋଦୀ ସଂଗଠନର ପ୍ରଚାରକ ଥିଲେ। ଅମିତ ଶାହା ବିଜେପିରେ ଯୋଗଦେବା ପରେ ସେ ପ୍ରଥମ ଦିନରୁ ବହୁତ ସକ୍ରିୟ ହୋଇଥିଲେ। ୧୯୯୦ ଦଶକରେ ସେ ଏବଂ ନରେନ୍ଦ୍ର ମୋଦୀ ଆଡଭାନୀଙ୍କ ସୋମନାଥରେ ଅଯୋଧ୍ୟା ରଥ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। 

୧୯୯୭ରେ ଗୁଜୁରାଟର ସାର୍ଖେଜ ବିଧାନସଭା ନିର୍ବାଚନମଣ୍ଡଳୀ ପାଇଁ ଉପ-ନିର୍ବାଚନ ଅନୁଷ୍ଠିତ ହୋଇଥିଲା। ଏହି ନିର୍ବାଚନରେ ​​ବିଜୟ ସହିତ ଅମିତ ଶାହାଙ୍କ ପ୍ରକୃତ ରାଜନୈତିକ କ୍ୟାରିୟର ଆରମ୍ଭ ହୋଇଥିଲା। ତା’ପରେ ୧୯୯୯ରେ ଅହମ୍ମଦାବାଦ ଜିଲ୍ଲା ସମବାୟ ବ୍ୟାଙ୍କର ସଭାପତି, ୨୦୦୯ରେ ଗୁଜୁରାଟ କ୍ରିକେଟ୍ ଆସୋସିଏସନର ଉପାଧ୍ୟକ୍ଷ, ୨୦୧୪ରେ ଗୁଜୁରାଟ କ୍ରିକେଟ୍ ଆସୋସିଏସନର ସଭାପତି ଭାବରେ ନିର୍ବାଚିତ ହୋଇଥିଲେ। ଏହା ସହିତ ସେ ୨୦୦୩ ରୁ ୨୦୧୦ ପର୍ଯ୍ୟନ୍ତ ଗୁଜରାଟ ସରକାରଙ୍କ କ୍ୟାବିନେଟରେ ଗୃହ ମନ୍ତ୍ରଣାଳୟର ଦାୟିତ୍ୱ ତୁଲାଇଥିଲେ। ତା’ପରେ ୨୦୧୯ରେ ସେ ଗୁଜରାଟର ଗାନ୍ଧିନଗର ଲୋକସଭା ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିଲେ। 

ଦ୍ୱିତୀୟ ଥର ପାଇଁ କେନ୍ଦ୍ରରେ ସରକାର ଗଠନ କରିବା ପରେ ୩୦ମେ ୨୦୧୯ରେ ଅମିତ ଶାହା ଦେଶର ଗୃହମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଗୃହମନ୍ତ୍ରୀ ଥିବା ସମୟରେ ସେ ଅନେକ ବଡ଼ ନିଷ୍ପତ୍ତି ନେଇଛନ୍ତି, ଯେଉଁଥିରେ ଧାରା ୩୭୦କୁ ଉଚ୍ଛେଦ ତାଙ୍କୁ କେବଳ ଦେଶରେ ନୁହେଁ, ସାରା ବିଶ୍ୱରେ ଖ୍ୟାତି ଆଣିଦେଇଥିଲା। 

ଆଜି ଶାହଙ୍କ ଜନ୍ମଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ୫୮ତମ ଜନ୍ମଦିନରେ ଶୁଭେଚ୍ଛା ଜଣାଇବା ସହ ଦେଶର ଅଗ୍ରଗତି ପାଇଁ ସେ ଅନେକ ଉଦ୍ୟମ କରୁଛନ୍ତି ବୋଲି କହିଛନ୍ତି। ସେହିଭଳି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ଶାହ ଭାରତର ଆଭ୍ୟନ୍ତରୀଣ ସୁରକ୍ଷାକୁ ଦୃଢ଼ କରିବା ପାଇଁ ଉତ୍ସର୍ଗୀକୃତ ଭାବରେରେ କାର୍ଯ୍ୟ କରୁଛନ୍ତି ଏବଂ ତାଙ୍କୁ ଦିଆଯାଇଥିବା ପ୍ରତ୍ୟେକ ଦାୟିତ୍ୱକୁ ସେ ଦକ୍ଷତାର ସହ ପାଳନ କରୁଛନ୍ତି। ଭାରତୀୟ ଜନତା ପାର୍ଟିର ଅନ୍ୟାନ୍ୟ ନେତା ମାନେ ମଧ୍ୟ ଅମିତ ଶାହଙ୍କୁ ଶୁଭେଚ୍ଛା ଜଣାଇଛନ୍ତି।