ગુજરાતમાં અહીં પુરુષો પગની આંટી વાળીને કરે છે ખાસ ગરબા, મહિલાઓને રમવા પર છે પ્રતિબંધ

પાટણના સરસ્વતી તાલુકાના ધનાસરા ગામે પ્રાચીન ગરબાની પરંપરા આજે પણ યથાવત છે. ગ્રામજનોએ પ્રાચીન એવા પગની આંટીવાળા ગરબાની પરંપરા યથાવત રાખી છે. આજે પણ ગામઠી વેશ ભૂષામાં માતાજીના ગરબે ઘૂમે છે. આ ગરબામાં ન કોઈ મ્યુઝિક સિસ્ટમ કે ન તો કોઈ લાઉડ સ્પીકરનો ઉપયોગ થાય છે. ભક્તિમય માહોલમાં દેશી પદ્ધતિથી માતાજીની આરાધના થાય છે. આજના આધુનિક યુગમાં પ્રાચીન ગરબાનું મૂલ્ય ગ્રામ્ય વિસ્તારોમાં જળવાઈ રહ્યું છે તે આ ગરબા સૂચવે છે. 

પાટણના સરસ્વતી તાલુકાના ધનાસરા ગામમાં ગામના વડીલો, યુવાઓ સફેદ કપડાંમાં સજ્જ ઓટી ગરબા રમે છે. આ ગરબામાં ન તો કોઈ સંગીત પાર્ટી કે ન તો ડીજે પાર્ટી હોય છે. ગામના વડીલો અને યુવાનો મુખથી ગરબા ગાઈને ગરબાની રમઝટ માણે છે. 

આ ગરબાની વિશેષતા એ છે કે, ખેલૈયાઓ પગની આંટી પાડીને રમે છૅ. નવરાત્રિના નવે નવ દિવસ દેશી ઢબથી આંટીવાળા ગરબા રમી માતાજીની ખાસ આરાધના કરાય છે.

બનાસકાંઠાના સરહદી ગામડાઓમાં થતી નવરાત્રિ કંઈક ખાસ હોય છે. અહી વસતા લોકો મોઢે માતાજીના ગરબા ગાય છે અને એ શબ્દોને ખેલૈયાઓ દોહરાવવામાં આવે છે. કોઈ પણ પ્રકારના આધુનિક ઉપકરણોના સંગીત વિના ફક્ત માઈક ઉપર ગાઈને રમતાં આ ગરબાની રોનક જોવા જેવી હોય છે. અહીના લોકો માત્ર મોઢેથી ઊંચા અવાજે માતાજીની ભક્તિના સ્વરૂપે ગરબા ગાતા હોય છે. 

ગામના એક અથવા બે મોભી કોઈ પણ સંગીત વગર મોઢેથી ગરબા ગાય છે અને તેમાં ભળે છે ખેલૈયાઓની તાળીઓનો નાદ. આમ, વાતાવરણમાં અનોખો જોશ પેદા થાય છે. 

બનાસકાંઠાના અનેક ગામોમાં યોજાતા આ ગરબામાં મહિલાઓને ગરબા રમવા પર પ્રતિબંધ છે. આજે પણ આ વિસ્તારના પુરુષ ખૈલયાઓ આપણા ભૂલતા જતા દેશી પ્રાચીન ગરબાને જાળવી રાખીને બેઠા છે.