Welcome 2021: નવું વર્ષ આવતા પહેલાં ઘરમાંથી બહાર કરો આ વસ્તુઓ, વધશે સુખ-શાંતિ અને સમૃદ્ધિ

તૂટેલું ફર્નિચર
કહેવાય છે કે ઘરમાં તૂટેલો પલંગ અથવા ખાટલો મુકવાથી લગ્નજીવનમાં કડવાહટ ઉભી થાય છે અને લડાઈ-ઝઘડા વધે છે. જો તમે ઈચ્છો છો કે નવા વર્ષમાં તમારા જીવનસાથી સાથે તમારુ જીવન ખુશખુશાલ વીતે તો ઘરમાંથી તૂટેલા ફર્નિચરને ઘરમાંથી તાત્કાલિક હટાવી દો. 

બંધ ઘડિયાળ
જો તમારા ઘરમાં કોઈપણ બગડેલી ઘડિયાળ પડી હોય તો તેને તરત જ ફેંકી દો અથવા સારી કરાવી લો પરંતુ બગડેલી ઘડિયાળને ઘરમાં રાખશો નહી. બંધ પડેલી ઘડિયાળથી ઘરમાં નકારાત્મક ઉર્જા ઉત્પન્ન થાય છે. સાથે જ સારા કામમાં પણ અડચણ ઉભી થાય છે. નવા કામમાં યોગ્ય ફળ મળતું નથી.

બગડેલી ઈલેક્ટ્રોનિક્સ વસ્તુઓ
નવા વર્ષમાં ઘરમાં રાખી મુકેલા બગડેલા જૂના ઈલેક્ટ્રોનિક્સ સામાનને બહાર કાઢી દેજો નહીતર ઘરનો માહોલ ખરાબ થઈ જશે. ઘરમાં રાખેલી ખરાબ વસ્તુઓથી ઘરમાં ખરાબ ઉર્જાનો સંચાર થાય છે. આળસપણુ ઉદ્ભવે છે અને કોઈ નવુ કામ કરવામાં મન નથી લાગતુ.

તૂટેલી મૂર્તિઓ
નવા વર્ષના સ્વાગતની પહેલા પૂજાઘરને સારી રીતે સ્વચ્છ કરી લેવું જોઈએ. મંદિરમાં ક્યારેય તૂટેલી મુર્તિ ન રાખવી જોઈએ. તૂટેલી મુર્તિને ઘરમાં રાખવું અશુભ માનવામાં આવે છે. આ તૂટેલી મૂર્તિઓને પૂર્ણરીતે તોડીને માટી સાથે ભેળવી દો અથવા જમીનમાં દાટી દો તેને ક્યારેય રસ્તા પર કે પાણીમાં ન ફેંકી દેવું જોઈએ.

તૂટેલા વાસણ
ઘરમાં તૂટેલા વાસણ રાખવાથી ઘરમાં કંકાસ વધે છે. નવા વર્ષમાં ઘરમાં શાંતિ અને ખુશહાલી જોઈતી હોય તો તૂટેલા વાસણોને ઘરમાં રાખશો નહી. આવા વાસણો ઘરમાં રાખવાથી કામ અટવાઈ જાય છે સંબંધો પણ તૂટે છે.

ફાટેલા બૂટ-ચંપલ
ફાટેલા બુટ-ચંપલ રાખવાથી કિસ્મત સાથ નથી આપતી. ફાટેલા ચંપલ કે બૂટ જીવનમાં નકારાત્મકતા અને દુર્ભાગ્ય લઈને આવે છે. તેથી જ જો ઘરની સફાઈ કરી રહ્યા હોવ તો જૂના અને ફાટેલા બુટ-ચંપલને ઘરમાંથી બહાર કાઢવાનું ભુલતા નહી.  

તૂટેલો કાંચ
કાંચ તૂટવું એ શુભ માનવામાં આવે છે પરંતુ તેને રાખી મુકવું ખુબ જ અશુભ માનવામાં આવે છે. ઘરમાં કોઈપણ તૂટેલા કાંચને તરત જ હટાવી લેવું જોઈએ. તૂટેલો કાંચ વાસ્તુ દોષ લઈને આવે છે જેનાથી માનસિક તણાવ વધે છે. 

સુકાયેલા છોડ
જો ઘરમાં પોઝિટીવ ઉર્જા જળવાઈ રહે તેવું તમે ઇચ્છો છો તો સુકાયેલા છોડને ઘરમાં રાખશો નહી. સુકાયેલા છોડ ઘરમાં નકારાત્મક ઉર્જા લઈને આવે છે. મૃત છોટ પણ ઘરમાં નકારાત્મકતાને નોતરે છે અને નસીબ પણ સાથ નથી આપતું.