Modi Cabinet Ministers 2024: આ વખતની લોકસભાની ચૂંટણીઓ ખુબ જ રસપ્રદ રહી. ભાજપ-કોંગ્રેસ સહિતના મોટા પક્ષોને પોતાની ધારણા કરતા વિપરીત પરિણામો જોવા મળ્યાં. ભાજપ અબકી બાર 400 પારનો નારો લઈને નીકળી હતી માંડ 240 સુધી પહોંચી. બીજી તરફ કોંગ્રેસ પણ તેમના અંદાજા બહાર પણ 99 સીટો સુધી પહોંચી ગઈ. પરંતુ આખરે એનડીએ ગઠબંધન દ્વારા મોદી ફરી એકવાર એટેલેકે, સતત ત્રીજીવાર ભારતના પ્રધાનમંત્રી બની ગયાં. ત્યારે સવાલ એ થાય છેકે, શું આ વખતે ગઠબંધનની સરકાર છે તો કોઈ દબાવમાં આવીને કોઈ મુસ્લિમ નેતાને મંત્રી પદ આપવાનો વારો આવ્યો હોય એવું બન્યું છે ખરાં?
શું ખરેખર આ વખતની મોદી કેબિનેટમાં કોઈ મુસ્લિમ નેતાને અપાયું છે સ્થાન? આ સવાલ એટલા માટે છેકે, અગાઉની બન્ને ટર્મમાં ભાજપ પાસે ફુલ મેજોરિટી હોવાથી તેમણે પોતાની મરજી મુજબની ટીમ બનાવી હતી. તેમાં કોઈ મુસ્લિમને સ્થાન નહોતું આપ્યું. પરંતુ આ વખતે ગઠબંધનને કારણે બધામાં પોતાની મરજી ચાલે એવી સ્થિતિ નથી. તો બદલાયેલી પરિસ્થિતિમાં શું ખરેખર રાજકીય સ્થિતિ પણ બદલાઈ છે? આ સવાલોનો સીધો સીધો જવાબ છે ના. આ વખતની સરકારમાં પણ મોદીએ પોતાના મંત્રી મંડળમાં એક પણ મુસ્લિમ ચહેરાને સ્થાન આપ્યું નથી. નીતિ બિલકુલ પહેલાંની જેમ સ્પષ્ટ છે. કોઈ કોમ્પ્રોમાઈઝ કરવામાં આવ્યું નથી. પહેલાંની બે ટર્મની જેમ આ વખતે પણ ચાલશે મોદીની જ મરજી, આ વખતે પણ બધા પક્ષોની ઉપર સરકારમાં ભાજપ જ રહેશે બિગ બોસની ભૂમિકામાં.
નરેન્દ્ર મોદી પહેલીવાર એવી ગઠબંધન સરકારના વડા બન્યા છે જેમાં ભાજપ પાસે બહુમતી નથી. રવિવારે મોદીએ સતત ત્રીજી વખત વડાપ્રધાન તરીકે શપથ લીધા હતા. સાથીઓમાંથી પણ 11 ચહેરાઓને કેન્દ્રીય કેબિનેટમાં સ્થાન આપવામાં આવ્યું છે. એનડીએમાં મંત્રીપદને લઈને કોઈ સંઘર્ષના સમાચાર નથી આવી સ્થિતિમાં, તે નિશ્ચિત છે કે ભાજપ મુખ્ય મંત્રાલયોની કમાન સંભાળશે. કેબિનેટમાં કુલ સાત મહિલાઓને સ્થાન મળ્યું છે, જેમાંથી બે - નિર્મલા સીતારમણ અને અન્નપૂર્ણા દેવીને કેબિનેટ મંત્રીનો દરજ્જો મળ્યો છે. મોદી 3.0માં કોઈ મુસ્લિમ મંત્રી નથી. દેશના ઈતિહાસમાં આ પહેલીવાર છે જ્યારે કેન્દ્રીય કેબિનેટે કોઈપણ મુસ્લિમ સભ્ય વિના શપથ લીધા છે. જાણો PM મોદીની આગેવાની હેઠળની કેન્દ્રીય કેબિનેટ તરફથી આવતા પાંચ મહત્વપૂર્ણ સંદેશાઓ.
1. ભાજપ જ રહેશે બોસ!
2024ની લોકસભા ચૂંટણીમાં ભાજપ એકલા હાથે બહુમતી મેળવી શકી નથી. તેને તેના સાથીદારોના સમર્થનની જરૂર હતી. કેન્દ્રીય કેબિનેટમાં ભાજપના 61 સભ્યો છે, એનડીએમાં અન્ય પક્ષોના 11 મંત્રીઓ છે. પીએમ મોદીએ સંદેશ આપ્યો છે કે આ હજુ પણ તેમની સરકાર છે. નાણા, સંરક્ષણ, ગૃહ અને વિદેશ જેવા મહત્વના વિભાગો ભાજપ પાસે રહે તેવી શક્યતા છે.
2. મોદી 3.0 માં પ્રોબ્લેમ સોલ્વર!
વડા પ્રધાન કાર્યાલયમાં બેસીને મોદી ચોક્કસપણે બધું નક્કી કરશે, પરંતુ તેમણે કેબિનેટમાં ઘણા મજબૂત પ્રશાસકો પણ રાખ્યા છે. એક-બે નહીં પરંતુ છ પૂર્વ મુખ્યમંત્રીઓને કેબિનેટમાં સ્થાન આપવામાં આવ્યું છે. શિવરાજ સિંહ ચૌહાણ, રાજનાથ સિંહ, મનોહર લાલ ખટ્ટર, એચડી કુમારસ્વામી, જીતન રામ માંઝી જેવા દિગ્ગજ નેતાઓની હાજરી મુશ્કેલ સમયમાં ભાજપનો રસ્તો સરળ બનાવશે.
3. ચૂંટણી પર નજર-
આ વર્ષે મહારાષ્ટ્ર, હરિયાણા અને ઝારખંડમાં વિધાનસભાની ચૂંટણી યોજાવાની છે. હરિયાણામાંથી નિયુક્ત કરાયેલા મંત્રીઓથી સ્પષ્ટ છે કે ભાજપ એ જ સોશિયલ એન્જિનિયરિંગ ફોર્મ્યુલા પર આગળ વધશે જેની સાથે તેણે બિન-જાટ ગઠબંધન કર્યું હતું. પ્રફુલ્લ પટેલે મંત્રી પદ ન લેવા અંગે ભાજપના નેતાઓની હાજરીમાં જણાવ્યું હતું. આ દર્શાવે છે કે મહારાષ્ટ્રમાં એનડીએ ગઠબંધન એ જ સ્વરૂપમાં રહેશે. ઝારખંડમાંથી મંત્રીઓની ચૂંટણી એ બિન-આદિવાસી જૂથોને આકર્ષવાનો ભાજપનો પ્રયાસ છે.
4. મુસ્લિમો નજરઅંદાજ-
જ્યારે મોદીએ 3.0 શપથ લીધા ત્યારે તેમાં એક પણ મુસ્લિમ મંત્રી નહોતો. કદાચ પછીથી કોઈ મુસ્લિમ ચહેરાને સરકારમાં સ્થાન આપવામાં આવે. જો કે કોઈ મુસ્લિમ મંત્રી ન બનવાનું કારણ એ અર્થમાં પણ જોવામાં આવે છે કે મુસ્લિમોએ ચૂંટણીમાં વિપક્ષને એકતરફી સમર્થન આપ્યું હતું.
5. મૂડીવાદીઓનો સથવારો-
મોદીના શપથ ગ્રહણમાં દેશના બે સૌથી અમીર લોકો- ગૌતમ અદાણી અને મુકેશ અંબાણી હાજર રહ્યા હતા. ભાજપે સ્પષ્ટ સંદેશ આપ્યો કે તે વિપક્ષના 'ક્રોની કેપિટલિઝમ'ના આરોપોને ગંભીરતાથી લેતી નથી. શપથ ગ્રહણ સમારોહમાં મોટી સંખ્યામાં હિંદુ સંગઠનોના લોકોની હાજરી દર્શાવે છે કે ભાજપ તેના મૂળ હિંદુત્વના એજન્ડાથી ભટકી જવાની નથી.
સમાચાર જગતની પળે પળની માહિતી હવે આંગળીના ટેરવે, તો રાહ કોની જુઓ છો, આજે જ જોડાઈ જાઓ અમારી WhatsApp channel સાથે