Himachal Pradesh Weather Alert: હિમાચલ પ્રદેશમાં વરસાદ અને હિમવર્ષાને કારણે બેવડી મુશ્કેલી ઉભી થઈ છે. ખાસ કરીને અહીં દેશભરમાંથી પ્રવાસીઓ ફરવા માટે આવતા હોય છે. આ સિઝનમાં આવતા પ્રવાસીઓની હાલ હાલત ખરાબ થઈ ગઈ છે. ભારે હિમવર્ષા અને વરસાદને પગલે મોટી સંખ્યામાં પ્રવાસીઓ અહીંની અટલ ટનલમાં ફસાયા હોવાની ખબર પણ સામે આવી હતી. જોકે, તંત્રએ ભારે જહેમત બાદ અટલ ટનલમાં ફસાયેલા 6000 પ્રવાસીઓને બચાવી લીધાં છે. હાલ તેમને સુરક્ષિત સ્થળે મોકલી દેવામાં આવ્યાં છે. એવી પણ વાત સૂત્રો જણાવી રહ્યાં છેકે, અટલમાં ફસાયેલાં પ્રવાસીઓ દેશના વિવિધ રાજ્યોમાંથી અહીં આવ્યાં હતાં. જેમાં ગુજરાતીઓનો પણ સમાવેશ થાય છે.
હિમાચલમાં હિમવર્ષાથી હાહાકાર!
અટલ ટનલના દક્ષિણ પોર્ટલ પર વાહનો અટવાયા-
હિમવર્ષાના કારણે રસ્તાઓ પર બરફની જાડી ચાદર જામી ગઈ છે. નાયબ પોલીસ અધિક્ષક (ડીએસપી) કેડી શર્માના જણાવ્યા અનુસાર, 'અટલ ટનલના દક્ષિણ પોર્ટલ પર બરફથી ભરેલા રસ્તા પર લગભગ 1000 વાહનો અટવાઈ પડ્યા હતા.'
6,000 પ્રવાસીઓને બચાવાયા-
અટલ ટનલ લાહૌલ અને સ્પીતિ જિલ્લાઓને કુલ્લુ સાથે જોડે છે. તેના દક્ષિણ પોર્ટલ પર ફસાયેલા લગભગ 6,000 પ્રવાસીઓને સફળતાપૂર્વક બચાવી લેવામાં આવ્યા હતા. શર્માના જણાવ્યા અનુસાર, વાહનોને મનાલી, સોલંગ અને પલચનમાં સુરક્ષિત રીતે લાવવામાં આવ્યા હતા.
સોમવારે સવારે ફરી હિમવર્ષા-
સોમવારે સવારે પણ અટલ ટનલ પાસે હિમવર્ષા થઈ હતી. શિમલાની સાથે કાંગડા અને અન્ય વિસ્તારોમાં વરસાદના અહેવાલ છે. ચંબામાં 11.0 મીમી, સીઓબાગમાં 7.8 મીમી, તિસા અને ભરમૌરમાં 4.0 મીમી, ડેલહાઉસીમાં 3.00 મીમી અને જોટમાં 2.4 મીમી વરસાદ નોંધાયો છે. મનાલીમાં 2.0 મીમી વરસાદ નોંધાયો હતો, જ્યારે કુકુમસેરીમાં 1.6 મીમી વરસાદ નોંધાયો હતો.
હવામાન વિભાગની ચેતવણી-
ભારતીય હવામાન વિભાગ (IMD) એ મંગળવારે હિમાચલ પ્રદેશ માટે યલો એલર્ટ જાહેર કર્યું છે. ઘણા વિસ્તારોમાં હળવોથી મધ્યમ વરસાદ પડી શકે છે. જોરદાર પવન (30-40 કિલોમીટર પ્રતિ કલાક) સાથે વીજળી પડવાની પણ શક્યતા છે. IMD અનુસાર, સોલન, બિલાસપુર, શિમલા, મંડી, હમીરપુર જેવા જિલ્લાઓમાં હવામાન ખરાબ રહેશે. લાહૌલ-સ્પીતિ, કુલ્લુ અને કિન્નૌરમાં ઘણી જગ્યાએ વરસાદની સંભાવના છે.
ફરી બદલાશે હિમાચલનું હવામાન-
IMD અનુસાર, બુધવારથી હવામાનમાં થોડી રાહત થશે. જો કે, 4 મેથી પશ્ચિમ હિમાલયન ક્ષેત્રને નવી વેસ્ટર્ન ડિસ્ટર્બન્સ અસર કરી શકે છે. આ કારણે હિમાચલમાં 4 અને 5 મેના રોજ યલો એલર્ટ જાહેર કરવામાં આવી શકે છે.
સમાચાર જગતની પળે પળની માહિતી હવે આંગળીના ટેરવે, તો રાહ કોની જુઓ છો, આજે જ જોડાઈ જાઓ અમારી WhatsApp channel સાથે