Digital India!!! પ્રિ-પ્લાનિંગ કરીને જન્મના માત્ર 2 કલાકમાં પિતાને મળ્યું દીકરીનું પાસપોર્ટ-આધારકાર્ડ

આધાર કાર્ડ, રાશન કાર્ડ, પાસપોર્સ જેવી વસ્તુઓ ભારતમાં બનાવવા માટે માણસોનો પરસેવો પડી જતો હોય છે. લાઈનોમાં ઉભા રહ્યા વગર, ધક્કા ખાધા વગર આ વસ્તુઓ બનતી નથી. ત્યારે સુરતના વરાછા વિસ્તારના એક બાળકીનું પાસપોર્ટ, આધાર કાર્ડ અને રાશન કાર્ડ તેના જન્મના માત્ર 2 કલાકમા જ બની ગયું હતું. આ ભાગ્યશાળી બાળકી બની છે નાભ્યા નાકરાણી. અગાઉ ત્રણ કલાકનો રેકોર્ડ હતો, જે હવે બે કલાકનો રેકોર્ડ બન્યો છે. 

સુરતના વરાછા વિસ્તારમાં વિસ્તારમાં રત્ન કલાકાર એવા અંકિત નાકરાણાની ઘરે દીકરીનો જન્મ થયો હતો. તેઓએ દીકરીનું નામ નાભ્યા રાખ્યું હતું. નાખ્યાનો જન્મ સવારે 10.30 કલાકે થયો હતો. માતાપિતાએ તેનું નામ અગાઉથી નક્કી કરી રાખ્યું હતું. જન્મની સાથે જ પિતાએ તેનું જન્મપ્રમાણ પત્ર મેળવી લીધું હતું. તો બીજી તરફ, પાસપોર્ટ અને આધાર કાર્ડ માટે નાભ્યાની આંખ ખોલીને તેને સ્કેન કરવામાં આવી હતી. આ સમગ્ર માહિતી વોટ્સએપ પર મોકલીને પ્રોસેસ કરાઈ હતી. બાદમા મેયર તથા પાસપોર્ટ અધિકારી દ્વારા તાત્કાલિક ધોરણે પ્રક્રિયાને લીલી ઝંડી અપાઈ હતી અને આમ, માત્ર 2 કલાકમાં બાળકીનો પાસપોર્ટ, આધારકાર્ડ માતાપિતાના હાથમાં હતું. 

મહામહેનતે ખોલાઈ બાળકીની આંખ
આ સમગ્ર પ્રોસેસમાં એક સમસ્યા એવી થઈ હતી કે બાળકી ઉંઘી રહેલી હોવાથી આઈસ્કેન માટે મુશ્કેલી પડી હતી. આ માટે બાળકી મહામહેનતે ઉંઘમાંથી જગાડવામાં આવી હતી. બાદમા તેની આંખ સ્કેન કરાઈ હતી. જન્મની 10 જ મિનિટમાં પાસપોર્ટ મેળવી લેવા માટે ઓનલાઇન એપોઈન્ટમેન્ટ મેળવી લેવામાં આવી હતી. આ માટે તેમને અડધા કલાકમાં જ અપોઈન્ટમેન્ટ મળી ગઈ હતી. નાના બાળકોને પોલીસ વેરિફિકેશન તેમજ અન્ય છૂટછાટને પગલે થોડીવારમાં તેનો ઓનલાઇન પાસપોર્ટ ઈશ્યૂ કરી દેવામાં આવ્યો હતો.  

ઉલ્લેખનીય છે કે, આ પહેલા ઓક્ટોબર મહિનામાં સુરતના પરબત પાટીયા વિસ્તારમાં જ જન્મેલ બાળક ઋગ્વેદને પાસપોર્ટ ઈશ્યુ કરાયો હતો. ઋગ્વેદ ભારતમાં સૌથી નાની વયનો પાસપોર્ટ ધારક બન્યો હતો.