રાજકોટમાં પાણીના પાઉચ પર પ્રતિબંધ, કમિશનરે લીધો નિર્ણય

રાજકોટઃ આવતીકાલે વિશ્વ પર્યાવરણ દિનને લઈને રાજકોટમાં પાણીના પાઉચ પર પ્રતિબંધ લગાવી દેવાયો છે. રાજકોટમાં મ્યુનિસિપલ કમિશનર બંછાનીધિ પાનીએ પીવાના પાણીના પાઉચ પર પ્રતિબંધ લગાવ્યો છે. મંગળવારથી એટલે કે વિશ્વ પર્યાવરણ દિનથી જ પ્રતિબંધ લાગુ કરી દેવાશે. એટલું જ નહીં ત્યારબાદ જો કોઈ પાણીના પાઉચ વેચતા દેખાશે તો તેમની પાસેથી દંડ પણ વસૂલવામાં આવશે. પાણીના પાઉચમાં બેક્ટેરિયા હોવાની માહિતી સામે આવતા આ પ્રતિબંધ લગાવવાનો નિર્ણય કરાયો છે. મ્યુનિસિપલ કમિશનર બંછાનિધી પાની અને મેયર ડો. જૈમન ઉપાધ્યાયએ આ અંગે સત્તાવાર રીતે જાહેરાત કરી હતી.