મિલકતની તકરારમાં નાના ભાઈએ કરી મોટા ભાઈની હત્યા, ભાભી પર પણ કર્યો હુમલો

ફોટોમાં દેખાતા બન્ને વ્યક્તિ પતિ પત્ની છે. જેમાંથી નરેશકુમાર હેમવાની હવે આ દુનિયામાં હયાત નથી. કારણ કે મિલકતના તકરારમાં નાના ભાઈએ જ મોટાભાઈની તીક્ષ્ણ હથિયારના ઘા મારી હત્યા કરી નાખી અને ભાભીને પણ મારી નાખવાનો પ્રયાસ કર્યો હતો. આ બનાવ ત્યારે બન્યો જ્યારે દિશા બહેન હેમવાની  પોતાના પતિ નરેશ કુમાર હેમવાની સાથે ફોઈના ઘરે જવા નવરંગપુરા ખાતેની કમલા સોસાયટીથી નીકળી રહ્યા હતા. તે દરમ્યાન દિયર સુનીલે ભાભી દિશા બહેનને માર માર્યો હતો. દિશા બહેને બુમાબુમ કરતા આસપાસમાંથી સોસાયટીના માણસો તથા કામ કરતા મજૂરો આવી ગયા હતા અને દિશાબેનને મુક્ત કરાવ્યા હતા. 

આ ઘટનામાં નરેશકુમારનું ખાનગી હોસ્પિટલમાં સારવાર દરમિયાન મૃત્યુ થયું હતું. હાલ આરોપી સુનીલ હેમવાની ખાનગી હોસ્પિટલમાં સારવાર હેઠળ છે. ફરિયાદમાં સામે આવેલી હકીકત મુજબ નરેશભાઈ અને સુનિલભાઈ બે ભાઈઓ છે પણ બંને વચ્ચે પારિવારિક ઝઘડાઓના કારણે છેલ્લા 20 વર્ષથી સંબંધ નથી. આમ મિલકતના વેચાણના ઝઘડા બાબતે ઉશ્કેરાઈ ભાઈએ જ ભાઈની હત્યા કરી ભાભી પર હુમલો કરી હત્યાની કોશિશ કરતાં પોલીસે આરોપીની અટકાયત કરી તપાસ શરૂ કરી છે.

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube