મારા પતિની લોકપ્રિયતાથી ડરે છે ભાજપ : લોકસભાની ચૂંટણી ન લડે માટે કરી રહી છે કાવાદાવાઓ

ભાજપ પર ટ્રીપલ એટેક-
ચૈતર વસાવાની બીજી પત્ની વર્ષાબેન વસાવાએ જણાવ્યું હતું કે ચૈતરની પત્ની શકુંતલાબેનનો કોઈ વાંક નથી છતાં તે જેલમાં છે. પક્ષના બોટાદના ધારાસભ્ય ઉમેશ મકવાણાએ પત્રકાર પરિષદમાં જણાવ્યું હતું કે ભાજપ સરકાર એસસી, એસટી અને ઓબીસી વિરોધી માનસિકતા ધરાવે છે, જો કોઈ પોતાના સમાજ માટે અવાજ ઉઠાવે છે તો ભાજપ સરકાર તેને દબાવવાનો પ્રયાસ કરે છે. ચૈતર વસાવા પહેલીવાર ધારાસભ્ય બન્યા છે અને ખૂબ સારું કામ કરી રહ્યા છે, તેથી ભાજપ સરકાર તેમને દબાવવાનો પ્રયાસ કરી રહી છે. 

ગુજરાત સરકારને ખેડૂતોની ચિંતા નથી માત્ર ઉદ્યોગપતિઓની ચિંતા છે. છોટા ઉદેપુર જિલ્લા પ્રમુખ રાધિકા રાઠવાએ જણાવ્યું હતું કે ધારાસભ્ય ચૈતરભાઇ વસાવાના પત્નીને કોઇપણ ગુના વગર ફસાવવામાં આવ્યા છે. તેમનું મનોબળ તૂટી રહ્યું છે, અને જેથી કોઈ મહિલા આગળ લડે નહીં. આદિવાસી વિસ્તારમાં 40-50 વર્ષથી કોઈ પ્રગતિ થઈ નથી અને જે પણ કામ થાય છે તે માત્ર કાગળ પર છે.

પોલીસ હેરાનગતિનો આરોપ-
ચૈતર વસાવાના પત્ની વર્ષાબેન વસાવાએ જણાવ્યું હતું કે વન વિભાગના 40-50 કર્મચારીઓએ મધરાતે એક ખેડૂતનો પાક કાપી નાખ્યો હતો. આ મુદ્દે ખેડૂતોએ ધારાસભ્ય ચૈતર વસાવા સમક્ષ તેમના વિચારો રજૂ કર્યા હતા. ચૈતર વસાવાએ આ બાબતે વન વિભાગના કર્મચારીઓ સાથે ચર્ચા કરી રાત્રી દરમિયાન બંને લોકો વચ્ચે મામલો થાળે પાડ્યો હતો. તેના ત્રણ દિવસ પછી ડીએસપી સરવૈયા અને 40 થી 45 પોલીસકર્મીઓ કોઈપણ જાતની પરવાનગી વગર રાત્રે અમારા ઘરે આવ્યા હતા અને અમારા ઘરની તલાશી લીધી હતી અને રાતભર અમને હેરાન કર્યા હતા.

સવારે 05:30 વાગે પોલીસ ફરી આવી હતી અને ચૈતરભાઈની પત્ની શકુંતલાબેનને પોલીસ સ્ટેશન લઈ ગઈ હતી. ખરેખર, આ સમગ્ર મામલામાં તેમનો કોઈ દોષ નથી. પછી અમે જોયું કે એફઆઈઆરમાં પણ ધારાસભ્ય વિરુદ્ધ ખોટો ગુનો નોંધવામાં આવ્યો હતો અને તેમને ફસાવવામાં આવ્યા હતા. FIRમાં લખવામાં આવ્યું છે કે ફાયરિંગ થયું હતું પરંતુ આવી કોઈ ઘટના બની નથી. આ ભાજપનું સંપૂર્ણ કાવતરું છે.