ગુજરાતમાં છે દેશનું સૌથી મોટું ગણેશ મંદિર, સિદ્ધિ વિનાયક મંદિરથી લવાઈ છે અખંડ જ્યોત, જાણો વિશેષતા

10 દેશોમાંથી ભગવાન ગણેશની પ્રતિકૃતિ
સિદ્ધિ વિનાયક મંદિર ભગવાન ગણપતિની આકૃતિ ધરાવતું દેશનું સૌથી મોટું મંદિર છે. આ વિશાળ મંદિરની ઊંચાઈ 71 ફૂટથી વધુ છે. મંદિરના ચોથા માળે મુંબઈના સિદ્ધિ વિનાયક ગણપતિની સમાન મૂર્તિ સ્થાપિત કરવામાં આવી છે. દેશના આ સૌથી મોટા ગણેશ મંદિરમાં મુંબઈના સિદ્ધિ વિનાયક મંદિરમાંથી અખંડ જ્યોતિ લાવી સ્થાપિત કરવામાં આવી છે. આ મંદિરમાં વિશ્વના અન્ય 10 દેશોમાં સ્થાપિત ગણેશજીની પ્રતિકૃતિઓ બતાવવામાં આવી છે. બીજા માળે સત્સંગ હોલ પણ છે જેમાં ભજન-કીર્તન કરવાની સુવિધા છે. ગણેશ ભગવાનના મંદિરમાં ક્યાંય સિમેન્ટ કે લોખંડ નથી વપરાયું પરંતુ જમીનની 20 ફૂટ નીચે શિલાનું ફાઉન્ડેશન છે અને એક જ શિલા પર તે ઉભું કરાયું છે. સમગ્ર ભારતમાં આ એકમાત્ર મંદિર છે, જેના છેક ઉપરના માળે ગણેશજી બિરાજમાન છે, જ્યાં જવા ભક્તો માટે લિફ્ટની પણ સુવિધા છે.

કેમ નદી કિનારે છે મંદિર ?
દાદરના સિદ્ધિવિનાયક મંદિરના માર્ગદર્શન અનુસાર ગણેશનું મંદિર બનાવવું હોય તો નર્મદા કે વાત્રક નદીનો કિનારો હોવો જોઇએ તેમજ તે સ્થળે સફેદ આકડો હોવો જરૂરી છે. એટલે જ વાત્રક નદીના કિનારે આ મંદિર બનાવાયું છે.

ગણેશ ચતુર્થી પર હજારો લોકો આવે છે
આ ગણપતિ આકારનું મંદિર જમીનથી 20 ફૂટની ઊંચાઈ પર બનેલું છે, જેમાં ભગવાન ગણેશની મૂર્તિ જમીનથી 56 ફૂટની ઊંચાઈ પર સ્થાપિત કરવામાં આવી છે. દર વર્ષે ગણેશ ચતુર્થીના દિવસે હજારો ભક્તો આ મંદિરમાં ભગવાનના દર્શન કરવા આવે છે. દેશના વિવિધ ભાગોમાંથી ભક્તો અહીં ભગવાન ગણેશની પ્રાર્થના કરવા આવે છે. અહીં આરતી અને પૂજાનું આયોજન કરવામાં આવે છે. ભગવાન ગણેશને તેમના પ્રિય લાડુ ચઢાવવામાં આવે છે. લોકો માને છે કે તેનાથી પ્રસન્ન થઈને ભગવાન લોકોના કલ્યાણ માટે આશીર્વાદ આપે છે અને દરેકની મનોકામના પૂર્ણ કરે છે.

ગણપતિ મંદિરની ખાસિયત
વાત્રક નદીના કાંઠે મહેમદાવાદ ખાતે 9મી માર્ચ, 2011 અને ફાગણ સુદ ચોથ, સંવત 2067ના રોજ મંદિરનું ભૂમિપૂજન કરવામાં આવ્યું હતું. આ મંદિરનું નિર્માણ આશરે રૂ. 14 કરોડના ખર્ચે કરવામાં આવ્યું હોવાનું મનાય છે. ગણેશ ભગવાનના મંદિરમાં ક્યાંય સિમેન્ટ કે લોખંડ નથી વપરાયું પરંતુ જમીનની 20 ફૂટ નીચે શિલાનું ફાઉન્ડેશન છે અને એક જ શિલા પર તે ઉભુ કરાયું છે. આ મંદિરમાં વિશ્વના અન્ય 10 જેટલા દેશોમાં સ્થાપિત ગણેશજીની પ્રતિકૃતિઓ પણ સ્થાપિત કરવામાં આવી છે. મુંબઈના જાણીતા સિદ્ધિવિનાયક મંદિરની મૂર્તિ જેવી જ મૂર્તિ અહીં સ્થાપિત કરવામાં આવી છે. દેશનું આ સૌથી મોટું ગણેશ મંદિર શહેરથી લગભગ 25 કિલોમીટર દૂર આવેલું છે.